Vawiin khan Finance Minister Pu Lalsawta chuan National Seminar on Participation of Women in Governance and Politics at Local and State Level hawnna hun neiin, khuallian  a ni. Ni Hnih awh tur National Seminar hi Mizoram Assembly Conference Hall-ah hman niin, Indian Institute of Public Administration-Mizoram Regional Branch (IIPA-MRB), UGC-Women’s Studies Centre, leh Department of Public Administration, Mizoram University buatsaih a ni. 

Khuallian chuan thusawiin, hmeichhiate hian khawvelah harsatna tam tak tawk tawhin an awm a, India ram-ah Constitution siam danglam anih vangin Municipal Corporation, Local Council leh Village Council level-ah hmeichhiate tan politics khawvelah kawng a inhawng chho zel a ni, a ti a. Mipa leh hmeichhia inthliar hranna (gender biased), mipa chungnung anga ngaihna leh hmeichhe hnuaihnung zawka ngaih tlatna hi khawvela thil la awm reng a ni, a ti bawk a ni. Hmeichhia te’n Politics khawvel an zawh dawnin harsatna an tawng tam bik niin a hriat, tiin a sawi a. Hmeichhia te chawi kanga, thlavang hauh tur hian mipate hi a pawimawh zawk kanni, a ti bawk a ni. Minister chuan vawiin seminar topic hi India ram chauh nilo, Europe leh America-ah te pawh sawiho hlawh tak niin, hmasawn zelna kawngah thil ngaihtuah tur pawimawh tak a ni, tiin a sawi.

Prof. C.Lalkima, Chairman, IIPA-MRB chuan kaihruaiin; Prof. Lalneihzovi, Secretary, IIPA-MRB chuan Seminar Theme Presentation neiin, tun dinhmunah Local Council-a Hmeichhe thlan tlin mi 142 an awm a ni, a ti a. Society, Economics leh Politics-a Hmeichhiate pawimawhna leh hmasawnna tur te a tarlang tel a ni.

He hunah hian Planning Secretary, Dr. C.Vanlalramsanga, Prof. Lianzela, Dr. Lalthanpuii leh hmun hrang hrang atangin Resource Person leh MZU zirlai tha hnem tak an tel.