Vawiin khan  Home Minister leh Rural Development Minister ni bawk Pu R Lalzirliana chuan Vairengte Bazar ah Bazar Building sak thar a hawng.

Hawnna inkhawm ah hian Khuallian chuan Bazar Shed chu chhungkaw tam tak ten eizawnna a tana an hmang tan thei tur chu lawmawm a tih thu sawiin Bazar Shed chu mipui ta a nih angin a enkawl leh a vawn thianghlim chungchangah mipuiten mawhphurna thui tak an neih thu tarlangin neitu rilru put a pawimawh thu a sawi a ni.

Sawrkar chuan Mizoram hmasawnna turin kawng hrang hrangin hma a la chho zel ani tiin tun hnai ah Medical College zirna hawn thar a nih thu tarlangin India rama Medical zirna hmun changtlung tak a beisei thu sawiin Mizoram Sawrkar leh HPC(D) in inremna thuthlung an ziak fel thei chu Mizoram chanchina thil chhinchhiah tlak tak anih thu a tarlang bawk. Mizoram Sawrkar chuan Mizote tana thil tangkai tak leh chhuanawm ni pha tur kawlphetha siam chhuah nan Tuirini chu BRICS (Brazil, Russia, India, China, South Africa) Bank tanpuina hnuaia khuah a tum thu a tarlang bawk a. Sawrkar chuan theihtawp a chhuah zel ani tiin Mizoram chu India rama State hmasawn chak pawl a nih thu a tarlang bawk a ni.

Pu R Lalzirliana chuan Vairengte chu Mizoram luhka khawpui a nih angin a chhunga cheng Khawtlang hruaitute leh mipuite chu kawng hrang hrangah Mizo te ai awh tu an ni foa, an inpekna leh tlawmngaihna chu chhuanawm tiin lawmthu a hrilh bawk a, Mizoram leh Mizo te humhimna kawngah khaw pawimawh tak an nih angin Vairengte mipuite chu tlawmngaihna chhuah chhunzawm zel turin a ngen bawk a ni.

Market Building sak thar hi NLCPR atangin Nuai 387.56 senga Mizoram PWD enkawlna hnuaiah NECS sak zawh niin Block pahnih a awm a, chhawng ve ve ni in Market shed ah hian Toilet, Canteen, Garbage Shed leh Conference Hall te awmin, Market Building pumpui zau zawng hi 1429.245 sq.mtrs a ni. Market Building hi Rural Development Department hmalakna hnuaia kum 2011 a Concept Paper siam niin, pawmpuina hi Central atangin kum 2013 a hmuh a ni a, Kum 2015 khan MPWD kuta hlan a ni.

Hawnna inkhawm ah hian Serlui A/C bialtu MLA Pu K.Lalrinthanga bakah RD, PWD hotute leh khawtlang hruaitute an tel a ni.