NEDP component pawimawh tak Entrepreneurship Development Scheme hnuaia Micro Start up Capital Competition buatsaih taka winner 15 te zinga mi Pu F. Lalrawngbawla siam VegsMart thlai thar zawrhna hmunpui Rajj House Venghlui a mi chu vawiin khan Finance Minister Pu Lalsawta’n a hawng.

Finance Minister Pu Lalsawta chuan thlai thar tute tana hralhna leh mipuite tana thlai thar leina hmunpui Micro Start up Capital Competition winner in a siam chu puitlina hawn a ni thei ta chu lawmawm a tih thu a sawi a.  Mi zawng zawng tan sawrkar hna ringawt a indaih theih loh avangin sawrkar chuan NEDP component pawimawh tak pakhat Entrepreneurship Development Scheme hnuaiah mi themthiam leh “idea” nei thaten eizawnna ngelnghet dinchhuahpui tham, mipuite tana tangkai leh awlsamna siamtu ni bawk an din theihnan nasa takin hma a lak thu a sawi a. Pu Lalsawta chuan kan thiltih apiangah thlai thar emaw, ran vulh emaw, sumdawnna ani emaw tih tak zeta luhchilha, hlawk tham tura beih angai tiin kalkhawmte thahnemngai taka thawk turin a fuih a ni.

He huna Khualzahawm Planning Secretary Dr. C. Vanlalramsanga pawhin thu sawiin India ram chhungah thlai eitur chu kawngpui kamah zawrh a nih tlangpui laiin Mizoramah dawr chhungah thianghlim taka zawrhna buatsaih a ni chu lawmawm a tih thu a sawi a. NEDP hnuaia Micro Start Up Capital Competition buatsaih taka winner in a buatsaih thlai hralhna leh leina hmunpui hi sawrkarin investment 50% a tum sak thu leh  50% dang leh chu mimal tum  a nih thu a tarlang a.  NEDP hnuaiah hmasawnna hmuh zel a beisei thu a sawi bawk.

VegsMart hawnna hi Pu F. Lalrawngbawla chuan kaihruaiin hma lak zel dan turte a tarlang nghal a, VegsMart chuan Sihphir farmers te nen thawhhona thuthlung an ziah thu leh veng tinah chawhmeh zawrhna nawr lirh theih chi kalpui a tum thu a sawi a. VegsMart ah hian thlai thartuten wholesale a an hralhna hmun Stock Point leh mipuiin retail-a an lei theihna hmun Air-Conditioned market leh inthiarna te  a awm bawk a ni.