Finance Minister Pu Lalsawta chuan vawiin chawhnu dar 2:00 PM khan MADS Annual Art Exhibition kharna leh High School leh Middle School zirlai te tana On the Spot Painting Competition buatsaih a tithate hnena lawmman semna hun a hmanpui. He Painting Competition leh Annual Art Exhibition hi Information & Public Relations Department leh Mizoram Art Development Society tangkawpin an buatsaih a ni.
Khuallian Pu Lalsawta chuan khawvel a civilisation hrang hrangte changkan dam teh nan 'art' lama an hmasawnna chu tehfung pawimawh tak pakhat a nih thu sawiin, Mizo thalai ten hemi kawnga hma an sawn theih nana MADS leh I&PR Department hmalakna chu lawmawm a tih thu a sawi a. Lemziak mawi tak chuan kan hriat ve loh hun leh hmunah te a taka awm ve ang maiin kan rilru a kaihruai theih thu sawiin, chumi atana pawimawh ber chu ngaihtuahna "idea" tha a ni, a ti a. Hmanlai atanga tunlai a khawvel huap artist hmingthang tak tak tw chuan hmanrua tha leh to tak tak an hman kherloh thu leh, an ngaihtuah a vang chauha kuthnu hmingthang tak tak te khawvelin kan neih thu sawiin Pu Lalsawta chuan Mizo te pawh idea tha kan neih chyan kan hniam bik chhan tur engmah a awmlo a ni, a ti a.
Finance Minister chuan ram dang anga industries lamah te chak taka hmasawn turin leilung hausakna tam tak nei ve lo mah ila khawvel hmun khawiah pawh chhawr tangkai theih "human resource", mihring thiamna leh theihna kan neih thu a sawi a. He 'resource' hi tangkaina belhchhah turin zirna leh training hrang hrang hmangin hma a lak theih thu a sawi a. Vawiin painting competition-a tel zawng zawng leh artist te pawh chung 'human resource' hlu tak an nih angin an talent-te tipung zel turin a chah a. Minister chuan hmalam thlir chunga pen zelin leh engmah in dal tir lo turin kalkhawmte chu a sawm a ni.
Vawiin hun hi I&PR Director Pu Jim K. Chozah chuan a kaihruai a, Pi Lallianpuii, I&PR Deputy Director leh Nodal Officer ni bawk in a tawiawm a. Pu Laltanpuia, MADS President in thu sawi bawkin, Pu Vanlalhriata, MADS General Secretary hnen atangin Art Exhibition leh zirlaite tana painting intihsiakna buatsaih leh kalpui dan tlangpui report ngaihthlak a ni. Hun hi Pu V. Laltlanmawia, MADS Finance Secretary in lawmthu sawiin a khar a ni.
On the Spot Painting competition-ah hian school hrang hrang atangin High School Section-ah zirlai 25 leh Middle School Section-ah zirlai 39 an tel a. Lawmman hi section pahnih atan a inang ve ve in buatsaih niin, certificate bakah pakhatna in Rs. 5000, pahnihna in Rs. 3000, leh pathumna in Rs. 2000 an dawng a. Heng bakah hian High School leh Middle School section atangin consolation prize (Rs. 500) dawng tur mi pasarih theuh thlan an ni bawk. High School section tan hian lemziak thupui (theme) chu "Nungcha Humhalh- Mihring tana a pawimawhna" emaw "Tui thianghlim - Mihring tana a pawimawhna" emaw thlan tur niin, Middle School Section tan "Ka duhthusam In - My Dream House" emaw "My Favourite Animal" a ni.
Vawiin On the Spot Painting Competition-a titha thlanchhuahte chu hengte hi an ni:
Middle School Section atangin
1. Harshit Sharma Thakur, Mt. Carmel School
2. R. Lalmuana, Gospel Centenary School
3. Esther Hansda, Govt. Comprehensive Model School
High school section atangin:
1. Lalrinmawii, KM High School
2. C. Vanlalvena, Govt. Comprehensive Model School
3. C. Lalrinkimi, Govt. Mamawii Highr School
Annual Art Exhibition vawiina khar tak hi tun kar thawhtan (14.11.2016) khan hawn a ni a. Aizawl Art Gallery, Khatla, S&S Gallery, Lower Zarkawt leh Art Novelty, Chaltlang ah te MADS member 74 atangin member 35 te kutchhuak pholan a ni.
