Vawiin khan Sihphir Branch YMA buatsaih 'Sikni Eng Kut' Sihphir field a hman chu Dy.Speaker leh bialtu ni bawk Pu R.Lalrinawma’n a hmanpui.

Kut pa Pu Lalrinawma chuan thu sawiin, mi tam tak in Kut phuahchawp tiin sawisel thin mahse khaw dang leh hmun danga an neih ve loh kut chu hlutpuiin Kut Pa ni tura an sawm pawh hi vannei a in tih thu a sawi a, kumtluana hna thawh hnua intihhlimna kut an nei thei chu fakawm tiin Pathian pawh in min phalsak angin intihlimna chu rilru leh taksa hriselna atana a pawimawh thu a sawi bawk a ni.

Sikni eng kut' chu intihhlimna chauh ni lova thalaite talent phochhuah na platform remchang tak a nih thu a sawi a, hnam nunphung leh khawsakzia pholanna leh humhalhna remchang a nih thu a sawi bawk. Tin khawtlang ti hmingthatu te chawimawina hun an hmang tel thin chuan kut chu a ti hlu lehzual tiin, kut hlawhtlin nan a sum leh tha thawhtu te leh chanvo nei zawng zawng te chungah lawmthu a sawi bawk a ni.

Kut chhimtu te chu fuihin midang tana harsatna thlentu ni lova hlimna leh malsawmna thlentu ni zawk tura mahni thlen chin atanga hmasawn zel tur in a chah. Hlim luata Pathian hriatloh a hlauhawm thu sawiin thalaite chu an vanglai a Pathian hre reng turin a fuih bawk.

Pu Lalrinawma chuan Mizoram sawrkar in Sihphir khaw tana kawng hrang hranga hma a lakna chu lawmawm a tih thu a sawi a. Tun dinhmunah GAWSS-II hnuaiah tui pipe phum mek niin SIPMIU in tuizem lian an siam mek thu a tarlang a. Tin kut hmanna sihphir field ah pawh indoor stadium changtlung tak sak thuai a nih tur thu a tarlang tel bawk.

Sikni eng kut hi Central YMA lam atang leh sawm bik ten an hmanpui a. Nilengin intihhlimna chi hrang hrang, zai, chai, hlado chham, cheraw kan, sarlamkai leh costume parade hmanga mizo incheina hrang hrang pholanna hun hman a ni.