Vawiin chawhnu khan Lunglei DC Pi Lalzarmawii, IAS office chamber-ah Lunglei Civil Hospital atanga doctor pathum sawn chhuah avanga MZP Sub-headquarters, Lunglei ten kawng an danchah chungchangah disrict hotute leh Mizo Zirlai Pawl (MZP) aiawh te an in dawr.

Pi Lalzarmawii chuan sawrkar kalphung kan hriat theuh angin rang takin mihring insawn zung zung a rem lo a, sawrkarin theihtawpin hma a la mek zel a ni, a ti a. Mipuite a tuartu zawk an nih thin avangin MZP ten highway an danchah chu titawp thuai turin a ngen a ni. Tun dinhmunah Lunglei Civil Hospital-ah doctor pakhat chauh dah tura hriattirna (notification) tih chhuah ni mahse, tawk lo chunga a tawk e kan tih thiam angai tiin, doctor dang dah belh turin sawrkarin hma a la mek a ni tih an hriatpui a duh thu a sawi a ni.

MZP aiawha lokal te pawhin sawrkarin an ngenna te ngai pawimawh a, Lunglei Civil Hospital-a doctor pakhat dah a nih tur thu chu lawmawm an ti a. Doctor pathum dah turin ngen mahse, an dinhmun an sawhsawn thu sawiin doctor dang pakhat tal dah belh theih nise an ti a ni.

Vawiina Lunglei Civil Hospital-a doctor pakhat dah tura hriattirna a chhuah bakah hian December thla tir lamah doctor dang pakhat dah belh tum a ni tih tarlan a ni a. MZP ten kawng danchah tihtawp an tum em tih erawh tun thleng hian hriat theih a la nilo a ni.