Vawiin khan Lawngtlai District Research Office chuan an Office-ah Annual Training for Registration Of Births & Deaths an buatsaih.

He hun hi Lawngtlai District Research Officer Pi H.Chhunkungi'n a kaihruai a. Training an buatsaih chhan te sawiin, khaw tina nau piang leh mitthi chhinchhiah chungchangah sawrkar laipui chu a khauh thar hle a, Birth Certificate chungchangah leh Job Card leh Electoral Roll-a mitthi tawh hming la chuang chungchangah te a fimkhur hle a; chu vangin training-a kalte chuan an thil zirte chu uluk taka zir turin a chah.

Research Officer Pu R.Lalthanglura, Deputy Chief Registrar, Directorate of Economics & Statistics, Aizawl chuan kal khawmte hnenah uluk takin zirtirna a pe a. Mizoram chhunga piang leh thi dik takte chauh chhinchhiah a, Certificate pek theih an nih thu te, VC leh NGO-te'n Mizorama piang lo chu Birth Certificate nei tura recommend loh tawp tur a nih thu te, Mizo hmeichhiain pasala hnam dang an neih chuan an pasalte hnam an chhawm a ngaih avangin, Mizo hmeichhiate'n hnam dang neih loh a him ber thu te a sawi a. Kohhranin hnam dang ring thar an neihte Mizo hming phuahsak kher chu thil tul lo tak a ni, a ti. Pu R.Lalthanglura chuan hnam dangin Affidavit hmanga an hming Mizo hminga thlak an dil thin chu ukilte'n tihsak lo se a tih thu leh Mizo ni lote'n Birth Certificate an neih tawh saa an hming dik tak chu Mizo hminga thlak phal a nih loh thu pawh a sawi bawk.

He training-ah hian Lawngtlai District chhung khaw 81-a Registrar of Births & Deaths te koh khawm niin, an kal tha hle a ni.