Vawiin chawhma dar 10 khan Aijal Club ah Indian Council on Agricultural Reaseach(ICAR)-Indian Institute of Oil Palm Research, Pedavegi, Andhra Pradesh, Department of Agriculture (CH), Government of Mizoram leh Department of Agriculture, Cooperation and Farmers’ Welfare, Government of India, New Delhi te tangkawp chuan Regional Workshop on Technological Strategies for Enhancing Oil Palm Production in North Eastern Region chu Finance Minister Pu Lalsawta’n a hmanpui.

Pu Lalsawta chuan Mizo mipuiten tun aia nasa zawka ram hausakna an haichhuah thiam theihna tur leh sumdawnna kawnga hma an sawn theih nana tanpuitu tur mithiam tak tak State pawn atangin an lokal thin a, tun tuma Oil Palm chin leh hralhchhuah kawnga mithiam lo zin mekte pawh hi Mizo mipuiten a tangkai thei ang bera an thiamna chhawr tur leh workshop hlawhtling a nih theihna tura a tel zawng zawngten uluk taka an ngaihtuahna seng turin a chah. Minister chuan kum zabi sawmpakuana hunlaia mipui leh sawrkar thuneihna inchuhtawn hunlai sawi chhuakin tun dinhmunah erawh ram fing apiangah mipui leh sawrkar thawhhona a tha a, an intichaktawn zawk thin, a ti a. Sawrkar tha chuan kawng hrang hranga eizawnna dap mek mipuite kawng kawhhmuhin an mamawh hmanrua leh thiamna a pe a, oil palm workshop pawh hi chutianga thawhhona tha thlentu hmanraw tangkai a nih ngei a beisei thu a sawi a ni.

ICAR-Indian Institute of Oil Palm Research, Director Pu. Dr R.K. Mathur pawhin thu sawiin Mizoram chu India Hmarchhak-ah Oil Palm tharchhuah kawgah hmahruaitu a ni mek tiin, Agriculture Department hmalakna te leh taimakna chu a ropui a ti. Oil Palm chingtute chu engtik lai pawhin an harsatna leh thiamthil lam ‘Technical Know How’ ah puih an inhuam reng thu te a sawi lang bawk a ni.

Inaugural function hi Agriculture Director (Crop Husbandary) Dr C. Lalzarlianan a kaihruai a. Kalkhawmte lawmna thu sawiin an department hmalakna hrang hrang a tarlang nghal a ni. Oil Palm hi Mizoramah 2004 atanga scheme hrang hrang hnuaia chin tan niin The Mizoram Oil Palm (Regulation of Production & Processing) Act, 2004 chu December 2, 2004 ah Mizoram Assambly ah pass a nih thu a sawi a. Tunah hian district pasariha khaw 225 ten ram hectare 23,358 a zauvah, Oil Palm hi an ching mek a ni tih leh kuthnathawktu mi 10,800 lai mai chuan hnathawh pui bera an neih mek thu a tarlang bawk a ni.

Regional Workshop hi Technical Session I, II leh III ah then niin scientist leh officer hrang hrangte’n kalkhawmte hi zirtirin power point presentation hmangin an entir dawn a ni. Naktuk ah hian Oil Palm chinna hmun leh Block Demonstration Plots Khamrang ah field visit an neih leh nghal dawn a ni.