Mamit District chhunga mipuite khawsak phung leh dinhmun te belchiang turin tukin zing karah khan Mizoram Governor Lt.Gen(Rtd.) Nirbhay Sharma chuan  Luangpawl Helipad, Mamit a thleng a. Vawiin nileng khan khawpui chhungah khawtlang hruaitute leh sawrkar hnathawk te nen inkawmna hun te nei  in vantlang hmun pawimawh te a tlawh.

Governor hi  a Secretary Pu Rodney Ralte leh Pu Chuku Apa, ADD, SIB ten an tawi awm a. Helipad ah Mamit Bawrhsap Pi R.Lalbiaksangi leh sawrkar mi pawimawh ten lo hmuak in Tourist Lodge pan pui a ni a. He tah hian hian Governor chuan tlawmngai pawl hruaitute, zirlai hruaitute, Bru Co-ordination Committee aiawh te, Chakma Community hruaitute leh Joint Village Council hotute a kawm a. Hemi hnuah hian  Deputy Commissioner’s Conference Hall ah Mamit District a Head Of Department leh sawrkar hnathawk te nen hun hmang leh  a ni. He hunah hian  Mamit a tlawh chhan te  tarlang in  District Office hotute te nen hian  inkawmna hun an hmang a. Governor chuan District HOD te hnen atang in an hmalakna te ngaithla in an harsatna te bakah rawtna  thlen te chu zirchian leh bawhzui atan  a dawn sak a ni.

Vantlang hruaitute leh official te  hma a thusawina hun hmangtu, Governor  Lt.Gen(Rtd.) Nirbhay Sharma chuan Mamit District hmasawnna atana pawimawh hmasa chu a chhunga cheng  mipui te in lungrualna leh thawhhona tha  a ni a ti a.  Chakma, Bru, Mizo leh hnam bil hran hran boruaksiamlo tur leh Mizoram hmasawnna tura lungrual taka thawhhona tha neih chu Mamit District mipui ten an mamawh ber a ni a ti. Border Security Force te pawh khawtlang hruaitu te leh District official ten khawtlang leh mipui hmasawnna tura hnathawhpui atan sawm theih an ni a ti a. “Sawrkar hmalakna leh District tih hmasawnna hna chi hrang hrang innghahna bulpui chu kawngpui tha a ni a. Hnathawktu thenkhat, sum phut vanga rukbo a nih thin avangin in kawngpui siam hna hi a chak lo fo tih in hriat ka ring. He thil huatthla la tak titawp tur hian mipui, Police leh District thuneitute zawng zawng  in tanrual a ngai a ni”, a ti. Health, Education leh Skill Development ah Mamit district chuan hmasawnna tur lai a la neih tam thu a sawi a.  Mamit thalaite, Sipai ah tamzawk an luh theih nan kawng a dap tur thu sawiin thla 6 chhung ngeiin thalai 50 te hnenah recruitment training, Police leh District Administration tangkawp ten an lo pek hmasak erawh a tul ang a ti. Mamit District chu NLUP ah a hlawhtling mek tih a lo hriat avanga a lawm thu sawiin hun reilote ah District hmasawn ber pawl an nih ngei a rin thu a sawi a. NLUP, Inkalpawhna tha leh ramri hrula chengte tih hmasawn hmasak chu Mizoram tan hlawhtlinna ropui ber leh state dang te umphakna awlsam ber a ni ang Governor chuan a ti a. College zirlaite a kawmna ah Governor chuan Mizo thalai te hian mi bik leh mi hlawhtling ni turin theihna zawng zawng an nei a. Tumruhna leh taihmakna nen thilropui tak an ti thei ang a ti. Thliarkar rilru put a hun tawh lova, khaw hawi ti zauvin inbuatsaihna tha zawk nen Mizoram a hmasawnna nasa tak lo thleng tur atan Mizo thalai te an lo inbuatsaih lawk dim diam a hun tawh a ni a ti. Mamit District SSA hnuaia hnathawk 40 lai mai an hnathawhna hmun ah awm lo tih hriat a ngai chu pawi a tih thu sawiin engvanga an hnathawhna hmuna awm lo nge an nih tih lo enchian thuai a tum ang a ti a ni.

Official report tarlan dan chuan Mamit District ah hian khaw 82 chhungah mihring 86, 364 an cheng mek a, tun thlenga Mamit District a  Bru raltlan rawn kir tawh zat chu 1558 an ni. District chhungah hian police 178 an awm mek  in  Central jail erawh a la  awm lo a ni.

Governor hian Jawahar Navodaya Vidyalaya (JNV), Mamit College, Mamit District Hospital leh Mamit Khiangthelh hmuna JNV building sak mek a tlawh hnu in Aizawl ah  Helicopter in a thlawk kir leh a ni.