Finance Minister Pu Lalsawta chuan vawiin chawhma dar 9:30 khan Mizorama United Bank of India Branch pathumna - Khatla Branch chu Thakthing Bazar, Mission Veng ah a hawng.

 Hawnna thu sawiin Minister chuan bank hawn hian mipui rawngbawl a keng tel a, a dawrtu mipui tan tanpuitu leh tiawlsamtu a ni tur a ni tiin a dawrtu mipui lam pawh rinawm leh dik a tul a ni, a ti. Mizo tam takin bank atanga loan an lak an rulh that loh avangin bank lam pawhin loan pek an tim phah a, chu chuan a hnu-a midang loan la tur te tan harsatna a siam phah zel a, a pawi hle a ni, a ti. Loan rul tha lo te avangin midang ding chhuak tur ten an tuar phah a, midang hlawhtlinna leh chhiatna thlen theitu chu keimahni vek hi kan ni, a ti. Loan la tu zawng zawng ten tha taka an rulh zel a pawimawh a ni a ti bawk. Mizo thalai thenkhat, ram dang mi ngaihsan avanga an bank account te hmantir a, buma awm ta tam tak awm chu pawi tiin Minister chuan heng kawngah hian Mizo mipui te fimkhur turin a chah bawk.

 3:16 Plan Solution neitu Pu John Lalpeka, UBI Aizawl Branch most valued customer pawhin thu tawi sawiin UBI atanga loan a lak atanga sumdawnna ti chho a nih dan te a tarlang a, bank chu mamawh te tan an inhawn reng thu sawiin loan lak erawh tha taka rulh a tul thu te a sawifiah.

 UBI Khatla Branch hawnna hi Mission Veng khawtlang hruaitute leh sawm bik ten an hmanpui a, Pu Janmejay Dikshit, AGM, Chief Regional Manager, Cachar Region chuan Khatla Veng ah in luah tur an hmuh mai loh vang leh RBI lam atangin Khatla Branch ti-a permission pek an nih vanga Khatla Branch chu Mission Veng-a dah a nih tak dan a sawifiah a. UBI hian ram pumah Branch 2006 a nei mek a, Mizoram ah Branch 3 awmin naktuk ah Kolasib ah Branch hawn tum a nih thu te a tarlang bawk.