Vawiin hian Lawngtlai District chhunga NLUP hnuaia Leilet (WRC-1) leh tlangram terrace hmanga thlai chin (WRC-2) thlangtu chhungkaw 833 te hnenah 2nd Phase 3rd Instalment pawisa sem a ni a; Line Department, District Agriculture Office a thawktute chu hlawm liah insem darhin District pumpuiah a rualin an sem a ni.

 Tukin zingah khan Lawngtlai East, Lawngtlai West leh Tuichawng Cluster a semtu turte chuan Lawngtlai chhuahsanin an semna hmun tur theuhte an pan hlawm a, Lawngtlai khawpui chhunga sem turte chu District Agriculture Officer Pu H. Joela hovin chawhma lam hian DAO Conference Hall ah sem a ni bawk.

 Pu H. Joela, DAO chuan ‘tun tumah hian WRC 1 thlangtu ten Rs 30000 theuh an dawng dawn a, heng an pawisa dawn te hi Calendar of Work in a kawhhmuh angin tuikawng laihna turte, thlam sakna turte, thlaichi, leitha leh hlo tur leina turte, fur thlai tuna chin mek enkawl nan tea hman tur ani. WRC 2 thlangtute hnenah Rs 20000 theuh sem a ni thunga, tuikhuah siamna tur leh thlam sakna tur atana pek an ni thung’ a ti a. Tun tuma WRC thlangtute tana sem ral zawng zawng hi nuaih 241.40 a nih thu a tarlang bawk.

 Pu H. Joela hian NLUP dawngtu te chu NLUP an sem rualin training an neih pui tur thu leh chumi atana inbuatsaihna pawh kalpui nghal a nih thu a sawi a, loneitute chu thlai enkawlna damdawi chi hrang hrang hman dan zirtir an ni ang a a ti. Thlai damdawi sem tur pawh engemawzat chu an keng tel nghal vek  tih a tarlang.