Vawiin khan Champhai DC Conference Hall-ah National Electoral Roll Purification and Authentication Programme (NERPAP) hnuaia Champhai District Special Observer Pu Zorammuana, UD&PA Director hovin he programme kalpui tawh dan thlirho leh kalpui zel dan tur sawihona neih a ni. Champhai District Election Officer Pu Benjamin Lalzama chuan sawihawnna hun a hmang a, district chhunga AERO-te, BLO thenkhat leh political party leh NGO aiawhte bakah media mite he thutkhawmah hian an tel a ni.

 Special Observer chuan Mizoram chu tlawmngai pawl te nen thawhhona leh tawiawmna tha tak a awm avangin vanneihna tak kan nei a ni tiin, AERO te pawh thil diklo ti tura nawr an awmloh nan an venpui thin tur a ni, a ti a. Vote thlak chu democracy rama awm te tan chuan kan dikna anih angin khua leh tui mi dik takin roll a tel a dil chuan thun mai tur a nih thu a sawi a. Amaherawhchu roll a hming chuang si, khua leh tui dik tak anilo tih finfiahna rintlak tak a awm chuan insawifiahna nghah ngai lovin electoral roll atangin hming a paih mai theih a ni, tiin roll a hming thun lai hi fimkhur ngaih hun tak a nih thu a sawi.

 Pu Zorammuana chuan electoral roll felfai neih leh aadhar registration ngaihpawimawh kawnga mipui lam an thanharh theih nan hma lak a la tul nia a hriat thu a sawi a. Electoral roll felfai leh rintlak tak nei tur chuan kan vaiin mawh kan phur a ni, a ti.

 Electoral Roll 2015 a lan dan in Champhai District-a Assembly Constituency panga chhunga vote thlak thei zat inziaklut chu 79,550 niin, Polling Station 134 a awm a. Tun dinhmunah Aadhar registration hi khua 100 an tih tawh niin, 12,703 lakkhawm tawh a ni a. Aadhar hnuaiah hian mobile number 41,516 leh e-mail addreas 293 lak a ni tawh bawk.