Tukin zing khan UD & PA Minister Pu Zodintluanga chuan BSUP ( Basic Service to Urban Poor ) Durtlang veng hnuailama mirethei te chenna tura In sak mek a hmun ah kal chilh in a hmunhma zawng zawng te a fangkual nghal.
Leimin leh tuihawk avanga building thenkhat sak zawk mek metre thum laia a tlak hniam bakah luah ngam tur a nih dawn loh avangin thiah leh vek a ngaih tur thu Minister chuan sawiin a dangte erawh chu sak chhunzawm zel in Sorkar kum thar ah chuan luah theih tura peihfel a beisei thu a sawi a.Nakin zel atan pawha tha thei ang ber tur ngaihtuah chunga Sorkarin hmalak anih laiin khawimaw lai fello leh khuarel chhiatna avanga harsatna te awm thei anih avangin uluk taka enpui a ngaih bak ah hemi ina a kaihhnawih Sorkar department dangte nen pawh la enthat a sawiho leh a ngaih bakah peihfel chian a nih hma in enpui fo a tul thu a sawi bawk.
BSUP Housing complex Durtlang a sak mek hi NPCC (National Project Construction Corporation Ltd ) leh Royal Infra Construction Ltd te sak leh enkawl a niin kum 2009 atang khan sak tan a ni a,building 20 leh Community Hall sak niin building pakhat hi chhungkaw tam tak chen theihna tur a ruahman a ni.Building pakhat zel sak nan hian Cheng Nuai 64 zel ruahman a ni in a vaia sakna atan Cheng Vaibelchhia 26.23 ruahman a ni bawk.Tun ah hian 75 % zawh tawh ani.Hetiang BSUP Housing complex hi Durtlanga sak mek bakah hian Rangvamual- Edenthar ah leh Lawipu- Chite ah te sak mek a ni bawk a ni.A building sak dan tur leh kalhmang te hi Central lam atanga design an rawn siam zuizuia kalpui ani.
Tun hnaia ruahsur leh leimin in a tihchhiat avanga building leh kawngte a chhiat mai bak ah hemi hmun panna tur kawng thenkhat te leimin leh tuihawk in a khawrh nasat avangin tukin zinga Minister leh amah tawiawm tu te motor tang chu JCB hmanga thenfai ngai laite a awm a, helai hmuna thlanmual lei min in a tihchhiat avanga hnatlang in hna an thawhna hmun te chu Minister hian a tlawh nghal bawk a ni.
