Vawiin khan I&PR Conference Hall, Mamit-ah World Blood Donor hman a ni a, Mamit DC Pu Vanlalngaihsaka’n a hmanpui.
Pu Vanlalngaihsaka chuan khawvel thiamna sang zel mahse thisen thlaktu tur siamchhuah a la nih loh thu sawiin, thisen pe thintu te avangin mi tam takin damna an chan phah a ni a ti a. Thalai te zingah thisen pe thei tura invawng leh in uluk an tam tial tial chu lawmawm a tih thu sawiin nun vawng uluk zel turin thalai kalkhawm te a chah a ni. Pathianin hriselna min pek te midang tanpui nana hmang tangkai turin kalkhawmte a chah a ni. Vawiina school naupang kalkhawmte hnenah Pu Vanlalnghaihsaka chuan Blood Donor Day hman chhan Karl Landsteiner te anga midangte hriatreng tlak hnuhma hnutchhiah thei tura tan la turin a fuih a ni.
Dr. Zothansangi, BBO District Hospital, Mamit chuan Mamit thisen pek chungchangah kum 2014-2015 chhunga Mamit dinhmun kalkhawm te a hriattir bawk. Mamit District Hospital a thisen pek zawng zawng hi unit 389 niin, thisen petu te hi mipa 310 leh hmeichhia 79 an ni a. Tlawmngaia thisen pek hi unit 269 niin replacement/ thisen hman rulh lehna hi unit 129 a ni. Thisen pek runpui hi vawi 7 huaihawt a ni bawk. Pawl hminga thisen pe te: Venghlun Branch YMA- 6unit, SAY Mamit Corps - 17 unit, Dilzawl section YMA - 12 unit, Dinthar leh Vengthar, Mamit - 7 unit, Dapchhuah YMA - 25 units, PYD NEI - 17 units leh MNYF ? 16 units an ni.
Vawiin Blood Donor Day hmannaah hian kum 2014-2015 chhunga thisen pe tam pawl leh mimal hnenah lawmman hlan a ni a. Pawl hminga pe tam unit 25 pe tu Dapchhuah YMA, unit 17 pe tu PYD NEI leh SAY Mamit Corps te hnenah thuziak, Dekchi lian leh pawisa fai pek an ni a. Mimal a thisen pe tam C.L.Zarliana leh Nancy Laldinthari, Mamit te hnenah pawisa fail leh thuziak pek an ni bawk a, an ni hian thisen unit 4 ve ve an pe a ni.
World Blood Donor Day hmanna hun hi Pu PC Lalliannghaka, DMS District Hospital, Mamit in a kaihruaia, Pu Ronghakliana Chhangte chuan kalkhawmte hnenah lawmthu sawiin hun hi tihtawp a ni.
