Vawiin khan Finance Minister Pu Lalsawta hovin Mizoram-a Insurance Company awmte chuan Insurance chungchangah inkawmhona pawimawh tak an nei a. He hun ah hian Mizoram-a Insurance Company hrang hrangte chu an tel tha hle a ni.

Finance Minister Pu Lalsawta chuan, Insurance Company te chu mipui rawngbawltu an nih hre reng turin a chah a. Lirthei neituten an lirthei te an insure ngei ngei hi vanduaina tawh palh thil ah thil tangkai leh tha tak a nih thu sawiin, hetih rual hian Insurance company te pawhin lirthei insure tu te chu an ngaipawimawh in an tih tur an ti ngei ngei tur a ni a ti bawk.

Pu Lalsawta chuan, Insurance Company ten office lian Regional office an neih ngei sawrkar in a phut thu a sawi a. Insurance Company-a insurance ti ten harsatna an tawh a, insurance an claim changin Insurance company-a hnathawk ten an sum an lo phut thin chu tha lo a tih thu sawiin, mipui ten an chanvo chang tur te tana sum an phut hi an sim hmak tur a ni a ti bawk.

Vawiina Finance Minister leh Insurance company te inkawmhona ah hian Insurance mipuiten kan ngaihpawimawh a tul chungchangte sawilan a ni a. Insurance company hotute chuan Mizoram-ah Insurance kan hmelhriat dan dik tawk lo te chu an ngaimawh thu an sawi a. Lirthei neituten an lirthei te an insure chu Police laka himna emaw tia an ngai thin chu kan ngaihdan thlak a hun hle tawh nia an ngaih thute an sawi. Lirthei neituten Insurance company-a an lirthei an insure chuan tawhsual an tawh nikhua pawn lirthei Insured te hi an pawikhawih man an Company hian a chawi thin a nih thute he inkawmhona ah hian sawilan a ni bawk.