Vawiin chawhma dar 11:00-ah khan Synod Conference Hall-ah kawlphetha hmangtute tana inzirtirna ni khatawh neih a ni a. He hunah hian NGO aiawhte leh official-te an kal thahnem hle.

He hun hmanpui tura Joint Electricity Regulatory Commission (Manipur & Mizoram) member Pu A. Chhawnmawia IDES (Retd) chuan, “Kawlphetha hi kawng engkimah mihring nun nena inkawp a ni tawh a, kan renchem thiam a ngai hle a ni” a ti.

Addl. D.C Pu Lalfela Sailo pawhin thu sawiin, “Kawlphetha pawimawhna leh a renchem dan tur inzirtir tulzia hi kan puanzar tam a ngai a ni” a ti. He workshop-a mipuite hnena zirtirna petu, Er. H.Thankunga chuan chipchiar takin kawlphethaa kan dinhmun leh JERC mawhphurna te a hrilhfiah bakah, Er. R.Romawia, EE chuan Kolasib District-a kawlphetha semzai a nih dante a sawifiah bawk.

Electricity Act. 2003-in Regulations siam tura a tih angin - JERC chuan Manipur leh Mizorama hman turin Tariff siamna dan “JERC M&M (Terms & Conditions for Determination of Tariff) Regulations, 2010” a siam a. He Regulations ang chuan Power Sector enkawl tu ten kum tin kumthara tariff hman tur dilna (Tariff Petition) Commission hnenah November thla ral hma in an theh luh tua a ni. Petition ah chuan kum liam ta leh kum kal lai meka power sector enkawl nana sum hman dan te, power hralh leh revenue hmuh dan te chian taka sawiin kum thara revenue sum hman tul zat tur leh revenue hmuh let a tum dan fel fai takin a sawi tur a ni. Commission-in Tariff Petition a dawn loh pawhin APTEL thupek angin “Suo-motu” hmangin tariff thar a siam thei.

Tariff pawh kumtin siam a tul: a chhan chu kumtin thilman pundan azirin Power Sector enkawl nana sum hman ngai zat pawh a pun ve zel avang leh thil man pun dan anga kumtina tariff tih san a nih loh chuan vawi lekhatah sang taka tih pun a tul a, mipui tan phurrit a nih theih vang te a ni. Hei vang hian India rama Electric lama thuneitu sang ber APTEL chuan kum tin tariff thar siam turin Commission te thu a pe.