Nimin tlai dar 3:00 khan Pu P.C. Lalthanliana, Horticulture Minister chuan Sihphira Iskut chingtu ten harsatna an tawh chungchangah a hmunah tlawhin tun kuma Iskut an thar tlem thut nachhan leh hmalak dan tur te a sawi pui in V/C House ah Iskut chingtu Association hruaitu te nen inkawm khawmna neih pui nghalin Iskut chingtute lam atangin harsatna an tawh chhan leh rawtna te pawh a ngaihthlak sak a ni.

Horticulture Department hian tun July thla khan an harsatna an lo thlen tawhna bawhzui in cheng nuai 20 chuang man leitha te a lo pe tawh a, tuna an beisei ang an thar loh na chhan hi khuarel avanga ruahtui tlak tlem vang anih theih thu te iskut chingtu association hruaitute chuan Minister hi lo hrilhin sawrkarin a tul hun taka tanpuina an ngaihtuah sak chungchangah pawh hruaituten lawmthu an sawi a. Tun hma pawh a tuna Chief Minister Pu Lal Thanhawla’n a hralh chhuahna tur market awmze nei tura hma alo lak sak tawhna ah tun thlenga a market ah an buai tak loh thu te sawi lang in Horticulture Minister in Horticulture Director leh officer te nen a hmun ngeia an tlawh chu an thlamuan thu an sawi a ni.

Pu P.C. Lalthanliana chuan harsatna hrang hrang an tawh an sawi zingah Tui leh Link Road tha an mamawh an sawi te pawh an mahni mai nilo Zoram pumah kut hnathawk tuten kan mamawh kan hlawhchhamna leh hlawhtlinna bul pakhat a ni tih sawrkar in a hria a; theihtawpin helamah hian Deptt. in hma a la mek a ni tih sawiin tuna an harsatna ah pawh deptt. anga theihtawp chhuahpui leh enfiah zui a Iskut chu thlai thar har lo a nih angin dinhmun ngai awh leh thei tura a chingtu leh sawrkar kan tan tlan phawt chuan he kan harsatna hi hun lo kal zel tura tha zawktura rahbi min siam sak tu ah a chang thei zawk a ni a ti bawk.

Iskut chingtu harsatna tawktu te hi Sihphir mai nilovin a chhehvel Lungdai tlangdungte an tel a, chhungkaw tamtakin eizawnnan hmangin State pawnah te pawh an hralh chhuak nasa hle thin a ni.