Vawiin chawhnu khan Finance Minister Pu Lalsawta hovin Mizoram University Conference Hall-ah New Economic Development Policy (NEDP) sawihona interaction programme neih a ni.
Pu Lalsawta chuan NEDP chungchang sawifiahin hlawhtlin tum tak tak te sawrkarin a tanpui dawn, a ti a. Hmasawnna kawng hrang hrang - health, education, industry, tui supply, kawng, kawlphetha, sports, agriculture, horticulture, AH&Vety, fishery leh a dangte huam kim vek tura duan a nih angin a tul dan anga sawrkarin ngaih pawimawh hmasak (priority) neiin hma a la zel dawn a ni, a ti. Minister chuan NEDP hian policy agenda pawimawh tak tak - administrative reform, land reform, climate change, business, power sector, skill development, public financial management reform, solving Aizawl city traffic jam te a keng tel a; ei khawp tawk tawk thar chhuah thinna (subsistence level) atanga buh leh bal, thlai, ranvulh leh cottage industries tam zawka deh chhuah a, market economy a hruai luh an tum thu he hunah hian a sawi a. Sawrkarin thalaite sports lama an tuihalzia hriaa khelmual tha a siamsak hnuah Mizoram chuan India rama football inelna sang ber berah a champion no mawi a chawi thei a, chutiang ang bawkin kuthnathawktute leh entreprenuers te mamawh intawm a pek phawt chuan Mizo hnam taima hi kan dingchhuak ngei dawn a ni, Pu Lalsawta chuan a ti.
NEDP ruahhmannaah chuan mi hausa te, lehkhathiam te, entrepreneurs ten contract farming hmangin loneitu/ranvulhtute an thawhpui ang a. An thar chhuah dahkhawm, sawngbawl leh hralh chhuahna an zawnpui ang. Sawrkar chuan buh leh bal, thlai, ran ngah theihna tur kawnga an mamawh intawm - link road, thar chhuah sawngbawlna tur khawl, thar chhuah dahkhawlna (go down, marker yard, cold storage, ice plant), tunlai thiamna technology hmang thiam tura kuthnathawkute tanpui leh company dinpui emaw a awmsa nena thawhhona kawng siamsak te a tihsak ang a. Kuthnathawkte chuan an thar chhuah tama, an thar chhuahte buaipui leh sawngbawl a nih dan tur zawng zawngte hre lawkin a let tam tak thar tumin a bei ang. Buh leh bal, thlai thar tam leh industry siam chhuah tihpun chu NEDP thil tum lian ber a ni a. Loneitute tan dinchhuahna leh sawrkar tan State deh chhuah (GSDP) tih punna a niin hna thawh tur neih loh vanga khawtlanga harsatna tam tak hi NEDP hian hnawhbo a tum dawn a ni.
NEDP chungchang sawihona hi MZU Student Council President K.Lalnunhlima’n kaihhruaiin MZU zirlaite bakah Mizoram Sawrkar Planning & Programme Implementation Secretary Dr.C.Vanlalramsanga leh mi pawimawh dangte an tel a ni.
