Finance Minister Pu Lalsawta’n vawiin khan Mizoram Youth Commission buatsaih Staff Selection Commission (SSC) coaching MYC Hall, Khatla ah a hawng. SSC Coaching hi EXCELL Class, New Delhi leh MYC tangkawpte buatsaih a niin tunah hian zirtir turin state pawn atangin mi thiam Pu Nipun Kohli, Director, Excel, SSc leh a thawhpui ten an thutchilh mek a. Vawiina Coaching hawn programme hi MLA pahnih Pi C Vanlalawmpuii, Chairperson, Women Commission leh Pu T Sangkunga, Chairman, Mizoram Youth Commission ten an hmanpui bawk a ni.

MYC buatsaiha 2nd batch coaching course zirtur thlan bik zirlai te duhsakna leh lawmpui thu sawiin khuallian Pu Lalsawta chuan zirchhuak tur chuan tihtak zetna rilru put a ngai a, dawngdahna nen a inrem lo a ni tiin MYC Chairman leh a thawhpui ten mahni kawtkaiah ngei hetiang zirna tha tak thalai leh thangthar te tana chhawpchhuah anih theih nana an hmalakna kawngah lawmthu a sawi.

Coaching a zirlai thlan chhuah te hnenah Minister chuan fuihna thu sawiin an zir hun chhung a thildang a in hambuai lo tur leh an tum ram an thlen hma chuan peng lo in, an hotute zah tur leh Mizoram leh hnam tizahawma chawimawitu ni turin a chah a. Mihring te hmelma ber chu Chapona a ni a, hneh ngei ngei tur a ni tiin Pu Lalsawta chuan Chapona hian a daih rei thei lova, thuawihna hian hlawhtlinna kawngah a hruai thin a ti a, mi thiam tak tak ten hmanraw changkang leh lehkhabu tha tak tak hmanga an zirtir te chu chhawr tangkai thiam tur leh ram leh hnam tana mi chhenfakawm ni ngei tura zir tura fuih in duhsakna hlan chung in SSC Coaching 2nd batch chu a hawng.

Pi C. Vanlalawmpuii, MLA pawhin thu sawiin MYC hnathawh chu a ropui a, sum sentur tamtak ah Sorkar in a dawmkan pui nasa a, thalaite hi lawm tur kan ni a ti a. Ngaihsan tur dik hi hriat a pawimawh a, mi neinung leh mi lar te hi ngaihsan tur an ni ber lo, mi dik leh mi rinawm,mi taima te chu ngaihsan tur an nih thu a sawi a. Tunlai khawvel ah Social Media a lar in zofate ngei zingah pawh a mikhual tawh lo, chutih laiin heng Social Media a thu hriat leh hmuh zawng zawng te awih mai loh ngam a ngaiin document leh proof n ah te hmuh anih loh phei chuan awih mai lovin chhui chian phawt a pawimawh thu a sawi bawk.

Pu Nghaklianmawia, Member, MYC kaihhruai vawiin programme ah hian Pu T Sangkunga, MLA Chairman, MYC chuan thusawiin he Staff Selection Commission Coaching atana an hmalak chhoh dan leh Sorkar in thangthar te hmakhua thlira an ngaihsakpui na ah lawmthu a sawi a. Tunah hian zirlai 282 in admission ti zovin an la ti mek bawk a, naktip mai ah Air Hostess tur mi 150 vel la tura inbuaisaih anih dan leh sipai lak runpui neih leh tum mek anih dan te a sawi. Vawiin Programme ah hian Pi C Rualkhumin Member, MYC in hunserh a hmang a, hun tawpah Pu Lalhmachhuana, Member, MYC in lawmthu sawiin hun a khar a ni.

MYC buatsaih SSC coaching in a tum ber chu Mizo thalaite Mizoram chhung mai nilova Central Sawrkar hnuaia hna chi hrang hrang te thawk ve thei tura an inbuatsaih theih nana he coaching hi buatsaih a ni. Coaching hi thla 4 course niin Course fee atan mi pakhatah Rs. 3000/- (Cheng sangthum) zirlaiten an pe a, a bak zawng Rs. 9000/- (Cheng sangkua) hi sawrkar in a tumsak ve thung. He Coaching buatsaihna  hi Govt. Dinthar PS -1 leh MYC Hall Khatla ah neih a ni a. Tuna SSC Coaching ( 2nd batch ) ah hian zirlai mi 315 awm mek in class hi shift thum zing chhun leh tlaiah then a niin zirlai ten an remchan dan angin an kal mai thin a ni.