Vawiin chawhma dar 11 khan DC Conference Hall, Keifangtlangah Champhai District Bawrhsap Pu Vanlalngaihsaka, IAS kaihhruaiin District chhunga khawpui a cheng zawng zawng ten mahni puala chenna in an neih theihna tura sawrkar laipui hmalakna Pradhan Mantri Awas Yojana (PMAY) - Housing For All (Urban) 2022 Mission chungchang ngaihtuahin District Level Screening Committee on PMAY - HFA (Urban) an thukhawm a. Champhai District chhunga khawpui pali, Champhai, Khawzawl, Khawhai leh Biate a cheng, mahni puala chenna in neilote hnena in sak tanpuina sem dan tur ngaihtuah a ni.

Meeting-ah hian Mizorama Pradhan Mantri Awas Yojana - Housing for All (Urban) 2022 Mission kalpui dan tur District Level Screening Committee Member Secretary Pi V. Lalmuanpuii, DUDO, chuan sawifiahin hmalakna peng pahnih, Beneficiary Led Construction (BLC) leh Credit Linked Subsidy Scheme (CLSS) te kalpui dan tur a tarlang a. BLC hnuaiah hian in sak tanpuina Rs. 1,50,000/- (Cheng nuai khat leh sing nga) pek theih niin hemi hnuaia tanpuina dawng tur hian Khawpui palite atangin dilna 4,222 dawn tawh a ni a. Dilna zawng zawngte hi a tahtawla spot verification neih tura ruahman a niin chuta Committee-in dawng tlaka a ngaihte chauhin insak tanpuina an dawng dawn a ni. BLC hnuaia tanpuina hi Champhaiah chuan in (house) 2,417 sakna turin Detailed Project Report (DPR) siam tawh a ni a, khawpui pathum dangte tan pawh Survey neiha thehluh thuai tum a ni bawk.Meeting chuan Champhaia BLC hnuaia insak tanpuina diltu 3,037 te chu July 2016 chhungin a zirchiang ang a, tanpuina dawng tur mi 2,417 an thlang chhuak dawn a ni. BLC hnuaia insak tanpuina dil tur hian India khua leh tui dik tak, kum khata Cheng nuai thum hnuailam lalut, insakna hmun tur nei leh kawng danga insak tanpuina dawnglo nih a ngai a. Hmeithai, pianphunga rualbanlo awmna chhungkua leh Senior Citizen (upa) awmna chhungkuate chu duhsak bik an ni ang. BLC hnuaia insak tanpuina diltu hi Khawzawlah 894, Khawhaiah 104 leh Biateah 187 an awm mek bawk a ni. CLSS hi Housing Loan Interest Subsidy-a kalpui tur niin State Bank of India, Mizoram Rural Bank, Mizoram Co-Operative Apex Bank leh Canara Bank-te kaltlangin Wconomically Weaker Section leh Low Income Group-te hnenah Cheng nuai ruk thleng pek a ni dawn a.

CLSS hnuaia loan hi State Level Banker’s Committee-in kum 2015-16 atan Champhai Town area-ah mi 80 hnenah chauh pek a phal rih avangin Bank palite chu Housing Loan 20 theuh pechhuak tura tih an ni a, he CLSS hnuaia Loan dilna hi 682 dawn a ni thung. CLSS hi kum 2022 thleng kalpui tura ruahmanna siam niin a scheme zawh hunah hian insakna tur loan mi 1378 hnenah pung tlema pek hman tum a ni.