Vawiin chawhma dar 10:30 khan Khawtetlang Field, New Serchhip-ah Independence Day vawi 68-na ropui taka lawm a ni a, Pu Lalsawta, Finance, Law & Judicial department etc., changtu Minister chuan khuallian niin a hmanpui. He India ram zalenna champha lawmna niah hian March Past Contingent12 (Armed Contingent-2, Unarmed Contingent-2 leh School Contingent-8) an awm a, 14 Assam Rifles Pipe Band in India hnam hla an rem bakah March Past neih laiin rimawi an tum bawk a ni.

Minister hian Independence Day lawmna hmun a thlen veleh hian India hnam puanzar a pawt pharh a, hemi zawh hian March Past nei tur parade contingent 12 te chu endikin Parade Commander Sub-Inspector Lalengliana, 3rd Batallion M.A.P kaihhruai March past parade contingent te chibai buk a chhanglet nghal bawk a ni.

Khuallian Minister chuan Sawrkar Flagship Programme NLUP chu chak taka kalpui zel anih thu sawiin kum thum kalta chhung khan a tira ruahman zat chhungkaw 1,20,000 zet chu phase hrang hranga thenin telh kim vek an ni tawh a ni a ti a, Serchhip District chu Mizoram District zinga hmasawn chak ber te zing ami ni a a hriat thu leh NLUP pawh tihlawhtling tha ber tura a beisei thu a sawi bawk.

Serchhip District a Sawrkarin hmasawnna hna kawng hrang hranga a thawh dan thenkhat tarlangin, PMGSY kaltlangin PWD in Chhingchhip – Hmuntha Road, Chhingchhip – Thentlang Road, Chhingchhip – Hualtu Road, Hmuntha – Khawbel Road te ‘black topping’ a tih mek thu leh hun tiam chhunga zawh hman ngei an inbeisei thu a sawi a, Serchhip-Buarpui Road, Asian Development Bank hnuaia cheng 259.20 vbc senga chei that tur pawh bultan tura peihfel anih tawh thu te, Serchhip District chu kum 2011 chhiarpui hnuhnung bera India rama ziak leh chhiar thiam tam berna (za a chhiarin) ani chu ropui a tih leh lawmawm a tih takzet thu a sawi a ni.

Minister chuan Serchhip District chhunga Sports tihhmasawn nan RGKA (Rajiv Gandhi Khel Abhiyan) hnuaiah Rs. Nuai 175 man Indoor Games 11 leh Outdoor Games 5 keng tel tur Sports Complex Serchhip Town Area a sak tum mek anih thu leh a sakna hmun tur pawh tihfel thawkhat anih tawh thu a sawi a, UD&PA Department hnuaiah Serchhip Town Hall, Mini Sports Complex (Hmar Veng), Boxing Hall (New Serchhip), Auditorium (Field Veng), Community Hall (New Serchhip & Dinthar) sak mek anih thu a sawi a, khawtlang tihhmasawnna tur leh rootling din nan Serchhip District bikah 13th Finance Commission hnuaiah Village Council hrang hrang 44 te hnenah Rs. 1,83,04,500/- (Nuai za sawmriat pathum sangli leh zanga) sem chhuah tawh anih thu leh heng sum hmang hian VC ten an khaw mamawh chi hrang hrang Step, Retaining Wall, Footpath, Water Storage Tank, Side Drain, RCC Culvert leh Thlanmual panna kawng siam nan te an hmang tih a sawi bawk.

Minister hian March Past Parade contingent te hnenah hian lawmman a sem nghal a, a titha zualte chu : Pakhatna – Lal Thanhawla Higher Secondary School, New Serchhip, Pahnihna – Little Flower Convent School, Serchhip, Pathumna – Marian High School, Serchhip te an ni a, parade contingent zawng zawng hnenah participation prize sem vek a ni.

Independence Day pual hian tukin (August ni 15) khan Old Age Home, Zoar Deprived Children’s Home, Adult Rehabilitation Centre leh Shalom Special School ah te Independence Day lawmna thilpek sem a ni bawk.

Independence Day pual inkhawm zawh anih hnu hian DC’s at Home chu sawmbikte tan DC Bungalow ah neih a ni.