Vawiin chawhma khan Finance Minister Pu Lalsawta chuan Accounts & Treasuries (A&T)Office, Chanmari a awm chu tlawh in A&T office a thawkte dinhmun leh an hna te a enfiah a. Minister hi Parliamentary Secretary Pu K.S. Thanga leh Finance Commissioner Pi L.N.Tochhawng ten an tawiawm a. Chief Controller of Account Pu Lalringliana leh a thawhpui Officer ten Finance Minister hi Office a section tinte fan kualpui in Staff te hmelhriattirna, an hna chungchang zawhna leh an harsatna neih thenkhatte lo hrilhhriatna hun an neih pui a ni.

A&T hotute chuan Mizoram a sawrkar hnathawk mek leh pensioner zawng zawng ten nitin an dawr thin thu sawiin an hmun hma rem loh vang te leh hnathawktu indaih hleih theih lovanga an harsatna te an sawi a. Office building thar lian zawk an mamawhna te a rang thei anga sak a nih theih nan Finance Department hotute chu an lo ngen a ni.

Finance Minister leh a thawhpui te pual hian CCA Office Conference Hall ah programme siam zui a ni a. He hunah hian Finance Minister chuan A&T staff-te fuihna thu a sawi a, indaih lo chung pawha an thawh nasat zia a hriatpui thu leh an mamawhte pawh Sawrkar in a theih anga a phuruk sak tur thu a sawi a ni. Finance Minister chuan A&T hnathawkte mawhphurhna chu a pawimawh thu leh Mizoram a sawrkar hnathawk 60,000 vel zet zawt hamthatna tur thil tinreng enkawl chu a hautak tur zia a hriatthiam thu a sawi a. He office a thawkte tan chuan Inpekna leh midangte te tana rawngbawlsak rilru put a ngai leh zual a ni a ti. A&T chu hmingthat thu sawiin Department hrang hrang atanga file an dawn apiang te chu a hun taka an peihfel thin a ni a ti a. Department thenkhat pension case leh file pawimawh thenkhatte A&T a thawn har an awm thin avangin chung Department mi leh sa te chuan harsatna an tawk thin a, chu chu Sawrkarin tha a ti lova chinfel a tum ang a ti. Sawrkar hna thar lak vangte leh new pension scheme 2010 avang te in A&T hna a pung tel a, staff thar lak a awlsam si loh avangin tuna thawk mekte chu ram hmasawnna atana thawk an ni tih hria a taima taka thawk zel turin a chah a. Office building thar a mamawhna te pawh sawrkarin a hria a, building thar saknan hma a la mek a ni a ti a. A&T hna alo awlsam zawk nan information technology changkang tak hman tum a nih tur thu a sawi a ni. Finance Minister chuan new pension scheme hmangtu 3295 an awm tawh thu a sawi a. He pension dan thar hmangtu sawrkar hnathawkte chuan an hlawh atanga 10% pension fund atan thlatin chhunglut ziah in an chhun luh zah chiah hi sawrkar in thlatin a chhun luhsak ve ziah a. He mi atana sawrkarin thlantin a senso chu Rs. 65.9 lakh a ni a ti. Minister chuan Department hrang hranga thawk te chu pension case peihfel hma thin turin a chah a, huntha zawng zawng sawrkar tana hmangral tawh te chuan an pension ni ngei in hlim taka an pension papers fel sa diam an dawn chu an phu hliah hliah a ni a ti.

Thusawitu dang, Parliamentary Secretary Pu K.S. Thanga chuan hna reng reng a harsa zawnga chhut chuan awlsam pakhatmah a awm lova, file leh case hrang hrang pawh thawh theih a awm thin lo a ni ti in a thawh theihna lam ngaihtuah hmasak a pawimawh thu a sawi a. Sawrkar hnathawkte tan chuan rilru inhawngsa, ngaihtuahna fim leh a theihna zawn hmuh tuma file reng reng hawn thin chu hlawhtlinna a nih tur thu a sawi a ni. Pensioner te zawng zawngte leh office dawr tu hrim hrim te chu thliar hran a thian loh thusawiin tute pawh ni se hawihhawm taka lo dawnsawn mai chu kohhran huang pawna Pathian rawngbawlna ropui tak nih thu a sawi a ni.

Finance Commissioner Pi LN Tochhawng pawn Pensioner databank pawh 13Th Finance Commission hnuaia project ah buaipui mek a ni a. Spectra Consultan chu pensioners’ data bank siam tur in ruat an ni tawh a ni a ti a.Pensioner ten record fel tak leh siam rem awlsam zawk te an neih nan a tangkai dawn niin a sawi bakah A&T hnathawhna hrang hrangah Information technology a tam thei ang bera hman chhoh tum a ni a ti.

CCA Office, A&T tia hriat bawk ah hian section hrang 8 awmin audit, loan and monitoring, project implementation, entitlement, GPF, pension, sawrkar hnathawk hamthatna dangte leh service kaihnawih a hna hrang hrangte an in thawh sem a ni. A&T Record in a tarlan dan chuan Group ‘A’ officer 3897 leh group ‘B’ officer 1071 te an awm mek a ni. Finance department hotute chuan A&T office hi New Secretariat ah sak tum a ni a, hmunhma pawh neih a ni tawh a. District hrang hranga Treasury office te computerize vek tura hmalakna neih mek a ni a, Kolasib leh Saiha ah te Treasury office sak tum a ni a, tender pawh chhuah a ni tawh a ni. Contract/Supply Bill, hlawh leh GPF withdrawal te pawisa fai a lak chhuah thin chu Electronic Payment(e-payment) a thlak in Internet kaltlanga sem fel tura ruahmanna siam mek a ni.