Vawiin chawhnu khan Armed Veng South MUP buatsaihin UPATE RUN hawnna hun hman a ni a, Finance Minister Pu Lalsawta, Bialtu MLA ni bawk chu Khuallian niin, Armed Veng South huam chhung pawl hrang hrang, MHIP, YMA leh Local Council hruaituten he hun hi an hmanpui.

Finance Minister Pu Lalsawta chuan, Mizoram Sawrkar chu mi taima leh tihtakzeta hmasawn tuma thawk thin te puitu an ni a, Armed Veng South MUP ten Upate Run sak puitlin a nih theih nan a thahnemngaitak leh tangrual taka an thawh ho avanga tha taka sak zawh a ni, a ti a, tangkai taka khawtlang mipuiten an hman theihna turin leh MUP ten zo taka an luahlum theihna turin duhsakna a hlan nghal bawk. Pu Lalsawta chuan, mihring taima leh tumruh tan khawi ramah pawh awm se hlawtlinna a awm a ni, a ti a, Ram leilung hausakna haichhuah chu a luahtute thawhrimna, taimakna leh tumruhnaah a in nghat thui hle a ni, a ti.Mihring taima leh thawkrim tamna apiang chu Khawvelah pawh ram hausa leh hmasawn chak berte an ni, a ti a, Kal khawmte chu rilru ah hmasawn tum tlatna nen, mahni hna theuhah rinawmna leh tihtakzetna vawng tlat turin a chah bawk.

Upate Run hawnna hun hi Pu Saphmingthanga, Armed Veng South MUP President in a kaihhruaia, Technical report te ngaihthlak niin Armed Veng South branch YMA, MHIP leh Local Council aiawhte hnen atangte in thusawi ngaihthlak a ni bawk. Upate Run hi MLA fund cheng Nuai 5 senga sak a ni.