Vawiin khan ATI-ah Project Himna MADAT (Mizoram Against Drugs, Alcohol & Tobacco) hnuaia hmalakna pakhat Training of Trainers for Church Leaders on Prevention of Substance Abuse hawnna hun neih a ni.

Aizawl DC Dr. A. Muthamma, IAS chuan hawnna thu sawiin training hi drugs, zu leh vaihhlo dona kawnga hmalakna pawimawh leh chhinchhiahtlak tak a ni a, Mizoramah a vawikhatna atan ruihtheih thil dona kawnga sawrkar leh kohhran tangkawpa hmalakna a ni hial a ni, a ti a. Project Himna MADAT training hi drugs leh a kaihhnawihin kan thalaite nun a tihchhiat nasat zia inhrilhhriatna a nih mai piah lamah kawng hrang hranga do theihna inzirtirna hun a ni dawn a ni, a ti a. Mizoramah khawtlang huapa hmalakna nei turin kohhran leh tlawmngaipawl nena tangkawpa hnathawh a ngai a, chuvang chuan Project Himna MADAT hlawhtlinna tur chuan anni hi an pawimawh hle a ni, a ti a. Training nei tur hian kohhran hrang hrang atangin in lo kalkhawm a, drugs, zu leh vaihhlo laka beihpui thlakna atan hian training-naa in zirte midang hrilh darhin in awmna kohhran theuhah thahnemngai taka hna in thawh zuia, ruihtheih thila talbuaite tanpui thlengin hma in lak a tul dawn a ni tiin a chah.

Project Himna MADAT (Mizoram Against Drugs, Alcohol and Tobacco) hi New Economic Development Policy (NEDP) hnuaia Aizawl DC Pilot Project niin ruihtheih thil laka thalaite an fihlim theihna tura beihpui thlakna a ni a. A enchhin nan Aizawl District chhunga school thlan bik 50-ah kalpui mek a ni a. Project hmalakna hnuaiah hian kohhran hruaitute tan training hi kalpui tura ruahman niin hei hian drugs, zu leh vaihhlo thatlohna inhrilhhriatna leh dona kawngah nasa takin a puih ngei beisei a ni.

Hawnna Programme hi ATI Director Pi Lalzarmawii, IAS chuan a kaihruai a. ATI Associate Professor Pi Lalnunmawii Varte chuan lawmthu sawina in hun a khar a ni. He hunah hian ATI hotute, Aizawl DC hnathawkte an tel a. Training hi May Ni 28 atanga June Ni 8, 2018 chhunga neih tur niin Baptist Church of Mizoram, Mizo Conference of Seventh-Day Adventist, The Salvation Army, Synod Social Front leh DIOCESE Catholic Kohhran, Aizawl atangin mi 30 vel an training dawn a. H&FW Department, MSACS, Project Sunrise atangin mi thiam tak takin zirtirna hun an nei dawn a ni. An zirtur topic thenkhat chu – Addiction of a process, Anxiety and Substance Abuse, Depression and Substance Abuse, Principles of Counselling, HIV Status in Mizoram, Role of Church in Substance Abuse tih te an ni.