Hmarchhak State hrang hranga lei min, tui dahkhawlna, kawngpui tlo lo leh chhe nasa lutuk avanga harsatna tawhte tihziaawm nana tun lai thiamna hman tangkai chungchang vawiin khan PWD Conference Hall, Aizawlah ngaihtuahho a ni a. PWD Joint Secretary Pu J.Zothanpuia chu khuallian niin sawrkar laipui Ministry of Textiles a Under Secretary Pu RK Srivastava chu khualzahawm a ni.
Geotextile leh a kaihhnawih technology hmanga kawng leh tui dahkhawlna siam bakah leimin tamna hmun hmar chhak State hmun hrang hranga lei min tihziaawm nana heng tunlai thiamna chhuak thar hman tangkai chu sawrkarin a tum a. Mizoramah pawh sawrkar laipui hian cheng vaibelchhe 66 senna tur Geotechnical textile scheme pathum : Champhai - Zokhawthar, Chhumkhum - Chawngte leh Serchhip - Buarpui kawng te chu a lo pawm tawh a ni.
Programme hi Ahmedabad Textile Industry’s Research Association (ATIRA) leh PWD, Mizoram tangkawp buatsaih a ni a. First session-ah hian ATIRA-NERC Guwahati in-charge PS Bardora chuan “Scheme for promoting usage of geotechnical textiles in NER” tih thupui hmangin thu a sawi a. Dr Lakshmana Rao, Geotextile Expert chuan “Application of three dimensional in highway construction” tih thupui hmanga thu a sawi bakah NIT-Meghalaya-a Assistant Professor Dr Sushmita Sharma pawhin “Application of Geotextile Fabric for Ground Improvement” tih thupui hmangin thu a sawi a ni.
Session hnihna ah Fibertex Pvt Ltd Director Pu S.Viswanathan, Dr Lakshmana Rao leh ATIRA-NERC Expert Engineer Pu SC Sharma ten thupui thlan bik hmangin thu an sawi a ni.
