Vawiin chawhmaah khan Finance Minister Pu Lalsawta chuan  Peter Street, Khatla ah Bank thar, Bandhan Bank Ltd. a hawng.

Bandhan Bank hawngtu, Finance  Minister Pu Lalsawta chuan NEDP hmalakna hnuaiah kuthnathawktuten an thawhchhuah te awlsam zawka suma an chantir theihnan sawrkarin ruahmanna asiam tih a sawi a. Sawrkar hmalakna ti chak thei tur hmanraw pawimawh ber zinga mi, miharsa ten sumdawnna kawnga bul an tan theih nana thawk hlawk tak  Bandhan Bank Aizawlah hawn a ni thei chu a lawm awm hle a ni a ti.  Sawrkar leh mipui ten Bandhan Bank chu beiseina sang tak nen Mizoramah an lo lawm lut tih a tarlanga. Bank ten an tihtur an tih theih nan leh tha taka mipui rawng an bawl theih nan bank dawrtute leh loan puktute’n tihtur pawimawh tak an nei a ti a. Bank dawrtute tana mawhphurhna pawimawh ber chu bank in inrelbawlna dan a siam te zawmsak leh loan an pekchhuahte tha taka rulh sak a nih thu a tarlang.

Bandhan Bank Ltd dintu leh CEO, MD ni bawk Pu Chandra  Shekhar Ghosh pawh Bandhan Bank, Aizawl branch hawnna ah hian rawn telin an Bank in a ngaih pawimawh zawng te a tarlang a. Chhungkaw aiawha hmeichhe eizawngtute leh sumdawnna tenau khawihtute bakah thingtlangmi te an dah pawimawh thu a sawi a. Kolasib ah Branch an neih tawh thu sawiin vawiina Finance Minister in  a hawn tak, Aizawl Branch bakah mipui mamawhna anga branch thar te pawh la hawn belh zel an inbeiei thu a tarlang a ni.