Tukin zingkar khan sawrkar laipuia Ministry of Human Resource Development Department in a beisei angin Sardar Vallabhai Patel piancham denchhenin Unity Run, Serchhip District  Education Department  buatsaiha neih a ni a, zirlai thlan bik 400 ten khaw chhungah Inpumkhatna Kawngzawh an nei a ni.

Vawiin hi India ram  inpumkhatna  leh ram pakhat  ni tura sulsutu pawimawh tak; ram zalenna sualna kawnga hmahruaitu langsar, Sardar Vallabhai Jhaverbhai  Patel, Union Home Minister  leh Deputy Prime Minister hmasa ber ni bawk piancham ani a. Hemi pual hian District Education Office hnuaia SDEO, DPC, SSA leh RMSA  buatsaihin  Serchhip Bazar atanga  Leisekawt field thleng Unity Run hi buatsaih a ni. He Unity Run ah hian Serchhip khawpui chhunga High School thlan bik 4 atangin  School naupang leh zirtirtu 400 (Zali) velin kawng an zawh a, a tawpna/kharna inkhawm tawi Leisekawt Field a neihah Pu Lawmawma District Education Officer in Unity run neih a nih chhan leh lawmthu sawina neiin, Pu Vanlalchhunga,  Headmaster, Govt Serchhip High School in Sardar Vallabhai patel chanchin chhiarchhuahna a nei  bawk.

India ram – mahni a ro inrelna thar a inpumkhatna atan chuan Patela inpekna hi a pumhlumin engmahin a khawih danglam theihloh ani a,chuvangin  IRON MAN OF INDIA  tih hial a ni. Amah ngaisangtuten a hming hmalam ah hian  Sardar (Hotupa/Lal)tih an dah belh hial a, amah  chawimawi  nan India sawrkar  chuan  a pianchamah hi – National Unity Day/Rashtriya Ekta Diwas atan puangin ram pumah School zawng zawngten hun an hmang dawn a, ni 6.11.2016 thleng he hun hi hman chhunzawm tur a ni.

Vallabhai Jhaverbhai Patel hi Ni 31^st October, 1875 khan  Gujarat ah lo piangin, India ram  inpumkhatna  leh ram pakhat  ni tura sulsutu pawimawh tak leh ram zalenna sualna kawnga hmahruaitu pawimawh tak ani a, British awpbehna hnuaia India a awm lai khan  Dan leh Policy  thalo te dona Non –Violence Civil Disobedience Movement huaihawttu leh “Quit India Movement’ nawrna tichaktu langsar tak a ni bawk a.  India Independent Act  hnuaia lal tenau mahni a ro in rel (Princely State) 565 vel zawng zawng deuh thaw kha india zawm turin a sawm hlawhtling bawk a ni.