Vawiin chawhma khan Finance Minister Pu Lalsawta chuan nihnih awh tur Indira Gandhi National Open University hnuaia North East leh East Zone (Orissa, West Bengal, Assam, Arunachal Pradesh, Nagaland, Mizoram, Tripura, Sikkim, Manipur, Meghalaya) Directors Meeting chu Aijal Club-ah a hawng a. Minister hi khuallian niin, IGNOU hnuaia course hrang hrang zir theih a ni hi lawmawm a tih thu a sawi a. IGNOU zarah Zoram dung leh vangah zirlai tam tak ten zirna an dawng hi hmasawnna rahbi pakhat a ni, a ti a. Mizoram-ah Human Resource a tam a, hemi human resource hi zirna (education) hmangin kan ti changkang thei a ni, a ti bawk a. Khawtlanga harsatna leh sualna lo pung te hi IGNOU hnuaia zirtheih Skills Development Course hmang te hian kan um kiang thei a ni tiin a fuih bawk a ni.

Khuallian Pu Lalsawta chuan IGNOU chu amah ngei pawhin a hmang tangkai a, Post Graduate Diploma in Cyber Law, Political Science leh Poultry Farming pawh a zir thu sawiin, zirna hi a pawimawh takzet a ni, tiin a sawi bawk a ni.

IGNOU-ah hian Learner Support Centre sangthum a awm a, zirlai nuai sawm chuang an awm a, Mizoram-ah hian zirlai mi sangruk awmin, North East bikah hian zirlai singruk leh sangriat an awm a ni. Mizoram bikah hian course sawmruk leh pasarih kalpui mek a ni a. Heng zingah hian Skills Based Entrepreneurship Course, ‘Poultry Farming’ te pawh Class 8 pass chin tan Mizo tawngin zir theih a nih thu te, Online registration a nih avangin khawpui leh thingtlang lam a Common Service Centre-te hmang tangkai tura inzirtirna neih a pawimawh thu te, zirlai ten an zirlai a hun taka an dawn theih nan Tracking System tha zawk neih dan te leh zirna senso (fee) hi Scheduled Tribe leh Scheduled Caste te tan za ah za chawitir an nih loh nan a hmalak a nih thu te sawi ho a ni.

Hemi hunah hian Mizoram University Vice Chancellor Prof. Sambasiva Rao, Dr. V.Venugopal Reddy, Prof. K. Ravisankar, Prof. PVK Sasidhar, Dr. S.R. Zonunthara leh director dang te’n he hun hi an hmanpui a ni.