Vawiin chawhma khan ‘National Conference on Strategies for Development of Higher Education in Northeast India’ tih thupui hmangin Mizoram University-ah seminar buatsaih a ni. Mizoram Governor Lt. Gen. Nirbhay Sharma PVSM, UYSM, AVSM, VSM (Retd.) chu Khuallian niin he seminar hi a hawng a. North-East Academy of Science and Technology (NEAST) a hawng tel nghal a ni.

Mizoram Governor chuan zirna (education) in hmarchhak ramte nasa taka a tihdanglam thu sawiin, Zirna In hrang hrang dinte chuan a mi chengte khawsak leh dinhmun pawh rawn chawikang in, eizawnna kawng tam tak a rawn hawn sak a ni, a ti. Hmarchhak biala thalaite chuan thiam thil leh theihna an neih that thu a sawi a. Heng thalai ziak leh chhiar thiam zingah hna hmu lo an tam thu sawiin, an thiamna mila eizawnna siamsak chu chona lian tak a nih thu a sawi a ni. Khawvel ramdangte ngaihtuahin India rama zirna sang zawkte chu an la that tawk loh thu a sawi a. Ramdangte el pha tur chuan kan zirlaiah value based education kan chinchhuah a hun tawh hle a ni, a ti. Hnathawh tur awm dan mila kan thiam thil te kan her rem chuan kan thalaite thiamna chhawr tangkaia a awm tur thu a sawi a. NEAST hawn tak chuan Science leh Technology lama kan thiamna a tih hmasawn a, chung thiamnate puandarhna dawhsan a nih ngei a duh thu a sawi bawk a ni.

He hunah hian Prof. Lalnundanga, Director, Human Resource Development Centre chuan inlawmna thu sawiin, MZU Vice Chancellor Prof. KRS Sambasiva Rao hnen atang in thusawi ngaihthlak a ni bawk a. NEAST bultantu Founder Honorary Fellow-te hnenah lawmpuina hlan a ni. Pu C. Zothankhuma, Registrar, Mizoram University chuan lawmthu sawiin seminar hawnna programme hi a khar a ni.