Vawiin khan Finance Minister Pu Lalsawta chuan Mizoram sorkar hnuaia Planning & Programme Implementaion Department leh Central YMA tangkawpa an buatsaih ‘One Month’s Training Programme on Aluminium Works, Cement Works & Floor Tile Works’ chu CYMA Central Hall, Tuikhuahtlang-ah a hawng a. He hunah hian Planning & Programme Implementation Secretary Dr.C.Vanlalramsanga bakah Central YMA President Pu Vanlalruata leh CYMA hnuaia Training & Youth Affairs-a hotu CEC Member-te pawh an tel.

Training hawnna inkhawm CYMA Training & Youth Affairs Chairman Pu John Kima kaihhruaiah Khuallian Pu Lalsawta chuan Aluminium, Cement leh Floor Tile phah hna thiam mamawhna sang hle mahse Mizo zingah an tlem a; hnathawh tur tam mahse thawktu thiam an tlem a ni tih hriain Mizoram sorkara Planning Department leh Central YMA te tawngkawp chuan heng mistiri hna hrang hranga training a buatsaih chho zel ta hi a lawmawm takzet a ni, a ti. Mizoten an zir thar leh tur chu hnathawhna kawngah chapo lo taka rawihtute thuhnuaia awm thiam te, hna uluk bakah taima tak leh rinawm taka sum senga min chhawrtute tana thawh thiam hi a ni, a ti bawk. Mizote vanneihna chu ram boruak sik leh sa nuam tak an neih te, tawng pakhat kan hman vekna te leh ziak leh chhiar thiam an tamna hi a ni a; heng hi hre rengin sorkar chuan NGO leh kohhran te nen thawkho zelin Mizo thalaite eizawnna tur kawng zawnpui leh dinchhuahpui hi a ngaihtuah reng a ni, a ti. 

Planning Secretary Dr.C.Vanlalramsanga pawhin thu sawiin Mizo thalaite hmasawnna tura hmalakna hrang hrang chungchangah Central YMA hruaitute thahnemngaihzia a fak a, Mizoram sorkar hmalakna pawimaw tak NEDP hnuaia entrepreneurship lama tui thalaite chawikanna leh bultan sak turin MEDMOC-in hma a la zel a, hemi hnuaiah pawh hian CYMA te nen thawkhovin thalaite tan hmalam eng tak siam chho zel chu an tum ber pakhat a ni, a ti. Hmun tam takah ‘Work Supervisor’ hna hi a ruak thin a, Mizo thlaite zingah qualify an lo awm mang lo bakah he hna atan course pawimawh zirna tur pawh Mizoramah a lo awm miah lo avangin tunah hian MZU nen tangkawpin thla 3 chhung Work Supervisor Course zirna tur buatsaih a ni a, hemi Course zirzote chu Certificate pawh pek thlap an ni ang, a ti. NEDP hnuaiah hian Central YMA Office thawmthat nan cheng nuai 200 pek a nih tur thu a sawi bawk.

Central YMA President Pu Vanlalruata chuan Mizo Kristiante hi thu tha kan ngaithla tam a, a zawm hi kan harsat a, insiamthat kan ngai hle a ni, a ti. Mizoramah hna a vang kan ti a, eng hna nge a vang kan tih chuan ‘sorkar hna’ hi a vang tawh a, chuvangin thalai lehkhathiam tak tak leh sumdawnna lamah pawh hawizau tak takte an rawn chhuak zel a, heng atan hian sorkar hna tlem mahse mahni kea din theihna tur kawng tam tak a la awm a; Mizorama hnamdang hnathawka awmte nekchhuak tur chuan thalai hna thiam an tam a pawimawh, a ti bawk.

Vawiina hawn tak Training hnuaiah hian Aluminium Works, Cement Works & Floor Tile Works zir tur Seat 50 theuh siam a ni a, an zavaiin mi 150-in he training chhung hian Service Provider hrang hrang hnuaiah zirtir an ni dawn a ni.