Vawiin khan PWD Minister Pu Lal Thanzara, Aizawl North III bialtu MLA chuan a bial chhung Edenthar leh Chanmari West a community hall sak lai a tlawh. 

Edenthar Community Complex sakna atana A/A Amount hi cheng nuai 481.52 a ni a. North Eastern Council atangin tun dinhmunah cheng nuai 243.72 hmuh niin Mizoram State in a do letna cheng nuai 27.08 a pe tawh bawk. Hna hi 99% thawh zawh tawh a ni a, September thla chhung hian hawn hman tura peihfel theih beisei a ni. He Complex hian chhawng li (4) a nei a, a chhungah hian Badminton Hall, skill development hall, board games khelhna tur bik leh lirthei hunna tur te a awm a. Edenthar Community Complex panna tur kawng chei that nan NEDP atangin cheng nuai 15.60 hmuh niin kawng awmsa rawt hniam a ni a, side drain chei that a nih bakah kawngpui hi concrete hmanga siam hna thawh mek a ni. 

Chanmari West Community Hall sak nana sum ruahman zat hi cheng nuai 475.28 a ni a, tunah hian North Eastern Council leh Mizoram sawrkar do letna sum cheng nuai 182.22 hmuh a ni tawh. Hna hi za zelah 97 thawh zawh tawh a ni a, kumin September thla chhung bawka hawn hman theih beisei a ni. Hall hian chhawng 5 neiin badminton khelhna, indoor games, multipurpose hall leh lirthei hunna chhawng hnih a awm dawn a ni. 

Pu Lal Thanzara chuan Edenthar leh Chanmari West veng ten hall tha tak an nei tur chu a lawmpui thu sawiin a hmangtu tur khawtlang mipui ten tangkai taka an hman a duh sak a. A sak hna enkawltu PWD Engineer-ten mipui duhdan mila an in pawtfan thei thin chu lawmawm a ti a, a sa tu contractor te pawh tha taka hna an thawh avangin an chungah lawm thu a sawi a ni. Minister chuan heng hall pahnihte hi tunlai chhuan te tan chauh ni lo, an tu leh fate thleng pawha hman tangkai chhunzawm zel theih tur rotling a ni dawn nia sawiin a enkawl zui hna pawh uluk hle turin a chah a ni. 

Minister Pu Lal Thanzara hi PWD Project Division-II Senior Executive Engineer Pu Lalthanzuala leh a hoten an tawiawm a ni.