Reserve Bank of India buatsaih, Financial Literacy Week chu vawiin khan Chief Secretary Pu Lalmalsawma chuan Hotel Regency Conference Hall-ah a hawng.
Chief Secretary chuan Mizoram chu lehkhathiam tamna, India ramah chuan zirna lama a ber kaite zing ami ni mah ila, financial literacy lamah chuan India state-te zinga hniam ber dawt kan nih avangin financial literacy week buatsaih a ni chu Mizoram mamwh tak a nih thu a sawi a. Sum leh pai enkawl dan dik kan hriat tawk loh avangin leh hemi kawnga kan hriatna a la hniam avangin ‘chiahpuam’ avangin mipui zingah sum hloh engemawzat kum kal tawh lamah an awm tawh thu te tarlangin Pu Lalmalsawma chuan sum leh pai chunagchanga hriatna a zau poh leh mipui an him thu a sawi a. Hemi kawnga RBI hmalakna chu bank tin ten tha taka an tawiawm a beisei thu leh, kumin literacy week atan a thupui thlan hrang hrangte hi sorkar laipui hmalakna nen te pawh inzulzui tak anih avangin a hlawhtlin ngei a beisei thu a tarlang bawk.
Financial Literacy Week hi vawiin June ni 5 atanga ni 9 thleng hman a ni ang a. A hawnna hunah hian khualzahawm Pu RK Srivastava, Chief General Manager, NABARD Regional Office, Mizoram bakah bank hotu dangten thu an sawi bawk a. He hunah hian banker-te leh thuthar lakhawmtute an tel a ni.
Mipuiin sum leh pai enkawl dan dik an hriatthiam a, an tana tha tur leh thalo tur te an thliar thiam theih nan te RBI chuan nikum 2016 khan Financial Literacy Week hi India ram pumah kumtin neih thin turin a ruahman a. Sum leh pai enkawl chungchang inzirtirna (financial literacy) hmalakna in a thil tum ber pali – sum khawl leh puk chungchang inzirtir, sum leh pai hman dan tur ruahmanna fel tak siam, mipui te dikna humhim leh, khawvel hmasawnna in a ken tel ‘going digital’ te a ni a. Heng thiltum pali behchhan hian kumin Financial Literacy Week thupui chu “KYC (Know Your Customer), Exercising Credit Discipline, Grievance Redressal leh Going Digital” tih a ni. RBI chuan ‘financial intermediaries’ kaltlangin sum leh pai chungchang inzirtirna hi a kalpui thin a. Bank hrang hrang ten Financial Literacy Centre (FLCs) siam in, khaw hrang hrangah inzirtirnate an nei thin.
