Vawiin chawhnu dar 1:00 khan Pu R. Lalrinawma, Deputy Speaker in Assembly Annex Building-ah KVIC, Ministry of Micro, Small and Medium Enterprises (MSME)-te bultuma buatsaih State Level Prime Minister’s Employment Generation Programme (PMEGP) Exhibition a hawng. 

Pu R. Lalrinawma chuan Mizorama small industries-te thil siam pho chhuahna hun pawimawh tak State Level PMEGP Exhibition buatsaih a nih chu lawmawm a ti a. Mizoram chu state kilkhawr tak a nih avang leh inkalpawhna a la that tawk loh avangin industry lian tham tak a la awm theilo a, tun dinhmunah chuan industry te zawk (micro, small and medium enterprises) te chawilen chu hna hmasa a neih a tul rih a ni, a ti. Industry hmasawnna turin sawrkarin theihtawp a chhuah chho zel a, hemi lama tan la zel turin kalkhawmte chu sawmin, hlawhtling leh hmasawn tur chuan teirei peih leh thawhrim a ngai a ni, a ti a.  Pu R. Lalrinawma chuan Mizote’n mahni dehchhuah hlut thiam a tul a, sawrkar laipui hmalakna Act East Policy avangin nakin lawkah Mizoram thil siamte pawh ram danga thawnchhuah theihna remchang a awm dawn a, chuvangin thil siam chhuah lama eizawngten ramdanga thawnchhuah tlak khawpa quality tha leh belhchian dawl siam chhuak tura tan an lak nasat a tul a ni, a ti bawk.   

He inkhawma khualzahawm Pu K. Lianzuala, Chairman, Mizoram KVI Board pawhin thu sawiin PMEGP hnuaia MKVIB hmalakna te kawlkhawmte a hrilh a. PMEGP loan atanga industry dingchhuak tawh leh industry bul tan mek te tan la zel turin a fuih bawk a. He inkhawmah hian Pu Kaisangzuala, Chief Executive Officer, Mizoram KVI Board (MKVIB)-in thuhmahruai a sawi a, vawiin programme sawi hawnna neiin, MKVIB hmalakna hrang hrang leh hmachhawpte a tarlang a. Pi T. Lalmuanpuii, Chairman Mizoram Cooperative Apex Bank (MCAB) leh Pi R. Lalrodingi, General Manager, District Industries Centre ten thu tawi an sawi a, Pi Rualkhumi, Director, KVIC in kalkhawmte hnenah lawmthu sawiin hun tawp a khar a ni. 

State Level PMEGP Exhibition hi Assembly Annex Building Basement-ah ruahman niin 5^th June atanga 10^th June hun chhung awh tur a ni a. Exhibition neihna hmunah hian thiamthil hrang hrang zawrhna dawr 34 hawn a ni. 

Prime Minister’s Employment Generation Programme (PMEGP) hi sawrkar laipui scheme niin, 15^th August 2008 khan ram pumah hman tan a ni a. He programme hian a tum ber chu eizawnna ngelnghet nei lo (unemployed) ten mahni eizawnna an neih theih na tura hmalak pui a ni. PMEGP hi Ministry of Micro, Small and Medium Enterprises (MSME) – in a enkawl a ni.