Tun hnaia Fines Arts a Bachelor leh Master Degree pass chhuak thar te - James Khamliansawma S/o Paul TK Dong, Zuangtui (M.A. Fine Arts in Sculpture, Hyderabad), Lalthlanchhuaha S/o Lalthlana, Keitum (B.A. Fine Arts, Santiniketan, Visva Bharati) leh John Lalchhuanawma S/o H. Manliana, Serchhip P&E Veng (B.A. Fine Arts, Santiniketan, Visva Bharati) te chu July 15, 2013 chawhnu dar 2:00 khan Art & Culture Department chuan Director Chamber- ah Director hovin an hlawhtlin lawmpuina hun hman sakin, Lawmpuina Thuziak an hlan.

Fine Arts lama mithiam tak tak (Master Degree ah phei chuan Mizo zinga a hmasa ber) kan neih belh ta hi hmasawnna ropui tak a ni a. He lama hma la mek, Institution of Music & Fine Arts, Art & Culture Department pawh hian a tak ram channa tur atan pawimawhna chang thei se a duhawm hle. He programme ah hian Department Officer te bakah Mizo Artist Society (MAS) hruaitu Pu Rosiamliana Ralte, President leh Pu Lalrohluna Ralte, Secretary te an tel bawk a ni.