1775/2022-2023
Vawiin khan Fire and Emergency Services chuan an kum 50 tlin lawmna F&ES Headquarters Huntharah an lawm a. Home Minister Pu Lalchamliana chu khuallian niin Home Commissioner Pu H.Lalengmawia leh DGP Pu Devesh Chandra Srivastava te chu khual zahawm an ni.

Pu Lalchamliana chuan F&ES hi department lian tak a ni lo chungin ram, in leh lo leh thil hlu kangral tur tam tak an lo chhanhim tawh a, indaih lo tak chunga kan ram leh mipuite himna tura theihtawp an chhuah hi an fakawm em em a ni, a ti. Kangmei laka mipuite kan lo him theih nan fimkhur inzirtirna Fire Safety Awareness an kalpui reng a, kum tin India ram puma hman thin Fire Service Week denchhenin Leaflet te siamin, kawng hrang hranga hma lak thin a ni, a ti. Fire & Emergency Services hian Fire Safety & Prevention chungchangah nasa taka hma lain kuminah ringawt pawh Office/Govt. building 24, heritage building pawimawh 21, institution 6, Hospital/Nursing Home 21 leh building lian engemaw zat, a vaiin building 79 laiah fire safety audit neih a nih tawh tih Home Minister chuan a sawi a. He Department thuam chak tur hian hma lak niin Ministry of Home Affairs, Govt. of India hnenah District hrang hranga Fire Station building sakna tur leh tihchangtlunna tur Project Proposal Expanding / Strengthening & Modernization of Fire Service of the state of Mizoram under the 15th Finance Commission Grant – in – Aid for the year 2020 – 2025, cheng nuai 4725 man hu theh luh tawh a ni, a ti.

He huna thusawitu dang Home Commissioner Pu H.Lalengmawia chuan Fire & Emergency Services ten mipui rawngbawl hna kum 50 hlawhtling taka an thawh tawh naah lawmthu sawiin Golden Jubilee duhsakna chibai a buk a. F&ES mi leh sa te chu mipuite entawntlaka rinawm taka hnathawk turin a fuih a ni. DGP Pu Devesh Chandra Srivastava pawhin F&ES Golden Jubilee a lawmpui a. Mipuiin kangmei laka invenna leh kangmei a lo chhuah palha chet lak dan tur an hriat theih nan mock drill neih fo te, tunlai thiamna hman tangkai te, khawpui chhung kawng a tet avanga motor lian aia motor te lam hman tangkai dan zir a tul zia te hunah hian a sawi a ni.

F&ES hi Mizoramah 1972 khan din a ni a, tunah hian Fire Station 14 awmin thawktu mi 183 an awm a ni. District tinah Fire Station dah a ni a, district thar 3 ah te pawh Fire Station hawng turin hma lak mek a ni a. Vairengte leh Tlabungah Fire Station a awm bawk. Fire incident/report hi 2019 khan 192, 2020 ah 214, 2021 ah 318 awmin kuminah hian July thla thleng khan 105 a awm tawh a ni. Kangmei chhuah rikrum thilah 101 ah Fire Department biak theih a ni a. ERSS hmangin 112 hmanga report theih reng a ni bawk.

Vawiin programme ah hian Home Minister Pu Lalchamliana chuan Fire & Emergency Services 50th Anniversary Souvenir a tlangzarh a. Director F&ES Pu C.Lalzahngoa’n sawmbik te hnenah memento a hlan a, Pu H.Lalengmawia’n thawktute hnenah anniversary disc a sem a ni.