Kumin chhunga kangmei laka invenna hapta “Fire Prevention Week” chu Champhai District tan vawiin khan DC Pu Vanlalngaihsaka, District Fire Prevention Committee Chairman chuan Champhai Venglai YMA Hall-ah a hawng. February ni 16 thleng he hapta hian a huam ang a, “Ram tikangtu – Ram hmelhma” tih thupui hman a ni.

DC chuan Champhai District chu ramngaw mawi leh leilung rem tak awmna a nih vangin a vannei takzet a, hmundang atang pawhin an rawn pan chakna chhan pakhat a nih thu a sawi a. Chung mite hip thei ber kan thing leh maute ti chereu zawnga kangmei chhuak tur kan ven loh chuan kan tuar tlang vek thei a ni, a ti a. Vawiina la dam te mai bakah kan thlahte zel atan thil tha ani tih vawng reng chunga Sorkar thil duan te hi zawm tlang turin DC chuan mipui kalkhawmte chu a sawm a. March ni 15 aia tlai lova lo/huan hal tur tih te pawh chu hretlang tura a duh thu leh, Dan bawhchhiate chu development sum hren sak thlenga an chungthu rel sak theih a nih avangin khawtlang hruaitute pawh tan la lehzual tura a duh thu a sawi a. Kan rilru theuhvah kan ram mawina leh sik leh sa, tui hna te hum tur hian tu mawh nge a nih a, enge kan tih ve theih tih inzawt tlang vek turin mipuite a chah a. He Hapta puan a nih chhan hi a hman a chhung mai bakah kumtluan leh damchhunga kan rilru a kan vawn a tul a ni, a ti.

Champhai DFO Pu Vanlalchuailova, DFO & Member-Secretary, District Fire Prevention Committee chuan thu sawi bawkin, mihring nun a ram leh mau pawimawhzia leh, ram tihkan laka fimkhur tulzia a tarlang a. Ram thenkhatah chuan ni sat em avanga ramngaw zau tak tak kang ta te buaipuiin an hmanhlel a. Mizoram chu kan vannei a chutiang buaipui tur chu kan neihloh lain a chhunga cheng mihringten kan nun atan an hlutzia ngaihtuah chianlovin keimahni kutkawih ngeiin ram kan tikang a, keini tan vek harsatna kan insiam ta thin a ni, a ti.

Vawiin Fire Prevention Week hawnna hun hi Pi V. Lalmuanpuii, DLAO leh Member, District Fire Prevention Committee chuan a kaihruai a. He huna Resource Person atana sawm Pu VL Chama Hnamte, President, Sub-Hqrs, YMA chuan ram ngaw tih chereu in mihring nunphunga nghawng thalo tam tak a neih dan te a sawifiah a. Champhai District-ah phei chuan tui hna te a kangchat mek zel thu leh, thal tak takah phei chuan duhkhawpin min chawm zo tawh meuhlo a ni, a ti a. Tun anga ramngaw dimdawi nachang hre lova kan kal ngaia kan la kal zel a nih chuan kum reiloteah kan mamawh khawp tui tlan tur kan hmulo mai ang, a ti a. Kangmei thelh chu hna hautak leh harsa tak a nih avangin chhungkua tinah ram kal turte chu mei laka fimkhur tura inhrilha inzirtir chu thil awlsam zawk leh awmzia nei a nih thu a sawi bawk.

Vawiin hun hi Pu C. Chawnghmingliana, RO chuan lawmthu sawiin a khar a. District Office hrang hrang hotute bakah khawtlang hruaitute leh Tlawmngai pawl hrang hrangte tel tura sawm an ni.