Fire Prevention Week 6th – 11th February, 2017 chhunga hman tura duan chu Kolasib District Level Fire Prevention Committee buatsaihin vawiin khan Diakkawn YMA Hall, Kolasib-ah hman a ni a, District Bawrhsap Pu H. Lalengmawia’n he hapta hi a hawng a ni. “Ram tikangtu - Ram hmelma” tih thupui hmangin he hapta hi hman a ni ang.

Kangmei ven Hapta hawnna inkhawmah hian Pu H. Lalengmawia chuan fimkhur tawk lohna avang leh dan zawm that tawk lohna avangin kangmei tam zawk hi a chhuak a ni a ti a, fimkhur tura inchah mawlh mawlh a ngai a ni tiin, inchah tam tawk a awm theilo a ni a ti a. Ram tihkan mai nilo, chenna in tihkan lakah pawh kan fimkhur hle a ngai a ni a ti a. Ram leh in lama kangmei a chhuah loh nana fimkhur tura in ngenna khawtin Village Council hruaituten vantlang aurinna hmanga kartin vawhnih tlangau thin turin a ngen a. Sawrkarin kumin March ni 15, thlenga lo hal theih hun a ruat chhunga hal ngei tur a loneitute ngen nawnin, thupek zawmlo te chungah dan angin an chungah hmalak a nih ngei dawn thu a sawi a ni. Bawrhsap chuan kangmei ven hapta hi hawn a ni a, mahse Kumtluanin hmalak chhunzawm anih dawn avangin Kolasib District-ah chuan khar a ni dawn lo a ni a ti.

Nikum 2016 chhung khan YMA branch hrang hrang te hnenah kangthelhna hmanrua 250 pek a ni a. District chhungah kangmei vawi 142 chhuakin, lohal vanga kang a ni.

Hapta hawnna inkhawm hi Pu C.Liankunga, President, Sub-hqrs. YMA Kolasib-in a kaihruai a. Pu C.Vanlalena, DFO in kum hmasa lama kangmei chhuah dan leh hmalak dan report a pe a. Pu C.Lalrinmauana, Forest Range Officer-in ram tihkan a pawizia Power Point Presentation hmangin kalkhawmte a hrilh a ni.