Tukin zing khan Road Safety Week (6-11 February) hawnna chu Mamit Field vengah neih a ni a, Pi Lalbiaksangi, District Bawrhsap chuan khuallian niin Week hawnna hun hi a nei a ni.

Pi Lalbiaksangi District Bawrhsap chuan Kumin Week thupui “ Nang leh i chhungte him theih nan Lamlian ah fimkhur ang che” tih chu week chhung chauha hmang lovin kumin kumtluan leh engtiklai pawha kan rilruah vawng turin lirthei khalhtute a chah a, Lirthei chetsualna tam tak chu kan fimkhur tawk loh vang leh harhfim lova lirthei kan khalh thin vang a ni a ti, keimahni mai bakah kan chhungte, kan pasenger te nunna humhim theitu kan nih tih inhrereng tura Lirthei khaltute chahin Week hawnna a nei a ni.

Pu H.Lianzela Addl D.C pawhin thu sawiin Lirthei khalhtute chu taksa peng hrang hrang mit, kutke, rilru leh ngaihtuahna sen ngai anih avangin, ti mai mai chung leh inthlahdah chunga hnathawhna chi a ni lo a ni a ti a, Lirthei chetsualna hmun li atanga hmun thum chu driver fimkhur tawk loh vanga thleng thin a ni, kan nupui fanaute chawmna, eizawn nana kan kawng zawh thin chu kan thihna hmuna kan chantir lohna turin Lamliana fimkhur taka Lirthei khalh thin turin leh kan tlan chhuah dawnin kan Motor dinhmun hre chiang hmasa turin Lirthei khaltute a chah a ni.

Pu P.C Lalchunglura, Addl SP Mamit pawhin kumtin Road Safety Week hman thin a ni a, chuti chung pawh chuan Lirthei chetsualna in ziaawm lam aiin zual lam a pan emaw tih mai tur a ni a, India ramah darkar khat chhungin Lirthei chetsualna vawi 57 thleng thin ang a ni a, hei hi minute khatah lirthei pakhat zel chesual zel ang kan ni, heng chetsualna thleng hi a tam ber chu Lirthei khaltute thiam loh a ni a ti. Mamit Police Station-a lirthei chetsuala report an dawnte a tarlang nghal a ni.

Dr.Hrangkapzawna, M.O Mamit pawhin Lirthei khaltute’n chetsualna an tawh a, Damdawiin thlen hma a, hmun leh hmuna damlo lo enkawl dan tur hrang hrangte a sawi bawk.

Road Safety Week hawnna Mamit Field Venga neih hi Pu Lalneihthanga Colney,SDC, Mamit in a kaihruai a, Mamit khawpui chhunga mipui phur chi lirthei khalhtu Maxi Cab leh Taxi driver tha leh fel thlanna a lawmman latute khuallian hian a hlan nghal a ni. Lawmman latute hi Maxi Cab Driver ah H.Zamliana, Vanchhawng Sumo Driver niin Taxi Driver-ah Vanlalhmuaka chu thlan a ni.

Road Safety week pual hian Car flag siam a ni a, tukin atang khan khawpui chhungah zawrh chhuah nghal a ni.