Vawiin khan I&PR Conference Hall, Mamitah Fire Prevention Week hawnna neih a ni a, Pi Lalbiaksangi, Chairman Mamit District Fire Prevention Committee, District Bawrhsap ni bawk chuan khuallian niin he hun hi a hawng a ni.

Pi Lalbiaksangi, Chairman, Mamit District Fire Prevention Committee chuan mizote chu kumtin lo vata hal thin kan ni a, hei hi kan bansan thei lo a nih pawhin huan nghet siama thingphun kan uar zual a ngai a ni a ti, lo hal hun atan Sawrkarin thuchhuah a siam a, March ni 15 hma a, lo/huan hal vek tura hriattir kan ni a, hemi zawm lote chu dan tlawhchhana man theih kan ni tih inhre thar turin kalkhawmte a chah a ni.

Pu Lalnunsanga, Khawlhring, DFO, Mamit & Member Secretary, Mamit District Fire Prevention Committee in report pek a lan danin Fire Prevention Week chu kum 2000 atangin Mizoram district hrang hrangah hman tan a ni a, Mamit District chu ramngaw chhah zawng vansang a thlalak atanga a lan danin 43 sq. kms a ni a ti. Kum 2013-15 chhung khan Mizoram chu ramngaw neih that ah kan tlahniam a, hetah hian Mamit District pawh 35 sq.kms in kan tla hniam a ni a ti, tun dinhmunah Mamit District chu ramngaw neih thatah Mizoramah pahnihna kan nih thu a tarlang.

DFO, Mamit chuan kum 2016 ah Ramkang venna kawnga hmalakna-ah Mamit District chu Mizoram District hrang hrangah pakhatna kan ni a, Fire Prevention Week 2016 pualin ramkang vengtha khua pathum Tuidam, Chungtlang, Kanghmun khuate thlan an ni a, lawmman tangka fai leh Chawimawina thuziak hlan an ni. Kumin pawh hian ramkang vengtha khua hi thlan an ni leh dawn a, heng bakah hian kangmei ven kawnga thuchhuah tha YMA chanchinbute tan lawmman siam a ni dawn bawk a ni a ti. DFO report a lan danin kum 2016 chhung khan Sawrkar thupek zawm lo, March 15 hma a lo hal lo, chhungkaw 161 man an ni a, kumin 2017 chu Mamit District ah Rawnal atam avangin fimkhur zual kan ngai hle dawn a, a hun taka lo hal vek tur leh ram tikang lo tura mitinte fimkhur a tul thu a tarlang a ni. Pu LDV Infimate, Associate Professor, Govt, Mamit College, pawhin thusawiin kan chenna khawvel chu kan tu leh fate tana chenna tlak ram siamtur chuan ramkang laka kan him a tul thu sawiin, a kum telin kan chenna khawvel chu a lum zual zel a, ramngaw siam leh a awmsa humhalh kawngah tan kan lak loh chuan chenna tlak ram kan neih loh mai a hlauhawm thu a sawi a ni.

Pu Zatluanga, President Sub Hqrs YMA pawhin ramkangin kan chenna khawvela nghawng tha lo tak tak a neihte tarlangin tuihna tha tak kan neihna tur chuan ramngaw humhalha ramkang laka kan ram kan ven a pawimawhzia uar takin a sawi bawk a ni.

Fire Prevention Week hawnna hi Pu P.C Lalchunglura, Addl SP, Mamit chuan kaihruaiin Nl. Mary Lalmalsawmi’n compere niin a host a. he hunah hian Mamit khawpui chhunga Sorkar Officials, Village council hrang hrangte,Tlawmngai pawlte bakah Pu Lalduhthlana DFO, Kawrthah a tel bawk a ni.