161/2025-2026
Aizawl the 14th April, 2025 : Kum tinin Fire Service Week hi India ram pumah 14t - 20 April chhungin hman thin a ni a. 14 April bik hi Fire Service Day/ Martyrs Day atan hman a ni bawk a. Kum 1944, April ni 14 khan Indo lawng lian tak 'S.S Fort Stikine' an tih chu Mumbai lawng chawlh hmun a lo thleng a. He lawng, ralthuam leh bomb lam chi tam tak phur hi a kang ta vak mai a. He kangmei chhuak rapthlak takah hian Bombay Fire Brigade mi 66 leh Bombay Salvage Corps mi 11 kangthelh tute chuan an nunna an chan phah a. Heng mitthi te hriatrengna atan hian Fire Service Day hi April 14 ah hian hman a ni ta a. April 14- 20 chhung hi Fire Service Week atan hman a ni thin a. He week chhung hian India rama Fire Service hrang hrang te chuan kangmei laka himna tur zirtirna an nei thin a ni.
Sorkar laipui chuan rampum a hman tur in kumtin Fire Service Week thupui a nei thin a. Kumin 2025 Fire Service Week thupui atan hian "Unite to ignite, a fire safe India" tih a thlang a. Mizo tawng chuan Kangmei lakah kan ram a him nan, i tangrual ang u" tiin a dah theih awm e.
Fire Service Week denchhen hian Fire Station tin ten Hospital/Nursing Home pakhat leh School pakhat zel kangmei chhuah thulh a a him leh him loh endik na neih a ni ang. Fire Station zawng zawng ten an area hnai vaiah Sikul thlan bik neiin Fire Safety Lecture & Mock Drill hi Sikul thuneitute nen inbe rawnin an buatsaih bawk ang. He week denchhen hian F&ES a thawk mi 5 (panga) te chu Director General- Fire Service, Civil Defence & Home Guard, MHA, Govt. of India chuan an hnathawh that avangin Bronze Disc & Commendation Certificate dawng turin a rawn thlang a, chungte chu:
- Leading Firefighter J. Zoliana Siaha FS
- Firefighter H Lalthlamuana Vairengte Fire Station
- Firefighter S. Lalremruata F&ES Hqrs
- Firefighter L. David Vungzaliana Khatla FS
- Driver Special Grade Thangchhuana Kolasib Fire Station
Martyrs Day/ Comemmoration Day Parade hi Aizawl ah chuan Fire & Emergency Services Headquarters, Hunthar Vengah ni 14 April, 2025 zing dar 7:00 a.m. khan hman a ni a. Aizawl pawn lama Fire Station te chuan ni 14 April, 2025 zing dar 9:00 a.m ah an mahni hmun theuh ah an hmang ve thung a ni. He Martar-te sunna hunah hian kangthelhnaa leh duty kaihhnawih a thi te sun nan Minute 1 (khat) ngawi renga dingin hun hman a nu a. An pual hian Martar thlanah Pangpar dah a ni bawk.
