DIRECTORATE OF INFORMATION & PUBLIC RELATIONS, Government of Mizoram, India

101/2023-2024

Dated Aizawl the 14th April 2023 : Kum tina India ram chhung a hman thin Fire Service Week chu Fire & Emergency Services Headquarters, Hunthar Veng Aizawl ah ni 14th April 2023 zing dar 7 khan hman tan a ni a. Aizawl pawn lama Fire Station te chuan he mi ni vek zing dar 9 ah an mahni hmun theuh ah an hmang ve thung a ni.

Kum danga lo kalpui thin angin April ni 14 bik hi Martyrs Day atan a hman leh niin, he Martarte sunna hunah hian nikum 2022 chhunga India rama kangthelhnaa thi mi pathum te hming chhiar chhuakin anmahni sun nan Minute khat ngawi renga dingin hun hman a ni a. Chungte chu :-

1. Sh. Praveen Kumar, Fire Operator , Delhi Fire Service

2 . Sh. Vasudev Sadashiv Haldankar, Leading Firefighter, Goa Fire & Emergency Services

3 . Sh. Nitin Singh , Fireman, Uttarakhand Fire & Emergency Services te an ni.

Kum 1944, April ni 14 khan Indo lawng lian tak ‘Fort Stikine’ an tih chu Mumbai lawng chawlh hmun a lo thleng a. He lawng, ralthuam leh bomb lam chi tam tak phur hi a kang ta vak mai a. He kangmei chhuak rapthlak takah hian Bombay Fire Brigade mi 66 leh Bombay Salvage Corps mi 11 kangthelh tute chuan an nunna an chan phah a. Heng mitthi te hriatrengna atan hian Fire Service Day hi April 14 ah hian hman a ni ta a. April 14th -20th chhung chu Fire Service Week atan hman zui zel a ni ta thin a ni. He Week chhung hian India rama Fire Service chi hrang hrang te chuan kangmei laka himna tur zirtirna an nei thin a ni.

He Fire Service Week chhung hian school hrang hrangah Fire Safety Awareness Programme hman a ni ang a. Sawrkar hmun pawimawh bik leh damdawi In hrang hrangte pawh kangmei laka invenna an neih that leh that loh endik nan hun hman a ni bawk dawn a ni.

Directorate General- Fire Service, Home Guard & Civil Defence Commendation (Bronze) Disc leh Certificate chu Lunglei Fire Station Staff mi 11(sawm pakhat) hnenah an hnathawh that avangin he Fire service Week ah hian dawng tura thlan an ni bawk a. Commendation Disc leh Certificate te hi a taka dawn a nih hunah sem a la ni dawn a ni.

Mei tel lo hian mihring a awm theih loh a, mitin tana pawimawh leh tangkai tak a ni a. Kangmei erawh mihring te tan chhiatna, beidawnna leh tahna, piansualna leh thihna hial thlen a, kan rohlu in leh lo te meivapa chantir tu a ni.Kum 2023 a he Week thupui atan hian ‘Kangmei laka fimkhur nachang hriat hi ram hmasawn zelna atan a pawimawh’ tih a ni.

Attachment