Kumtina India ram puma hman thin anih angin kumin 2015 ah pawh Fire Service Week 2015 chu April 14 - 20, 2015 chhung hian hman a ni leh dawn a. Mizoram ah pawh uar takin he hapta hi hman tum niin vawiin dt. 10 th March, 2015 khan Pu Lalmalsawma IAS, Chief Secetary kaihhruaina in C.S. Conference Room-ah he hapta hman dan tur relin meeting pawimawh tak neih a ni.

Kumin ah hian Fire Service Week thupui (theme) chu “To prevent Fire - Adopt Safe housekeeping practices & Approved Electrical Appliances” tih a ni.

Meeting ah hian kangmei lakah mitinte kan him zawk theih nan leh fimkhur a tulna laite huam zau takin sawiho a ni a, meeting chuan Fire Service Week 2015 hman dan tur tlangpui duang chhuakin mawhphurtu turte a ruat nghal bawk a ni. Hapta hawnni hian Kangmei laka fimkhur a tulzia, Chief Secretary thuchah DDK leh Local Cable ah te tih chhuah ni se,

Mipui/vantlang ah zau zawka kangmei laka fimkhur a tulzia in hriattir nan chanchinbu hrang hrangah leh Local Television/ DDK/AIR ah te mai bakah zirna sikul hrang hrang ah inzirtirna buatsaih ni se.

Department hrang hrang ten week hawn ni hian staff meeting te neiin kangmei laka fimkhur a tulzia inzirtir ni se,

Dan kalh a, kawng sirah leh mahni in a Petrol/Diesel zuartu dapchhuah a dan anga hrem ni se, tih te leh Vengtin V/C leh Local council ten a zing thei ang bera kangmei laka fimkhur a tulzia mipuite hnenah tlangau hmanga puanzar ni se tih te rel a ni a.

Hei bakah hian Hapta khar ni ah Aizawl khawpui chhungah kangmei laka fimkhur a tulzia mipuite zirtir nan Fire Department ten kangthelh motor hmangin awareness programme buatsaih se tih te rel a ni bawk.