Vawiin khan Home Department Additional Secretary Pu Lalbiakzama hovin a office chamber-ah Fire Service Week 2016 hman dan tur rel a ni a. Sawrkar laipui Ministry of Home Affairs atanga Week hman dan tur kaihhruaina lo kal chu thlir ho niin, sum awm dan mila ruahmanna siam a ni.
He hunah hian Fire Service Week 2016 hman tur denchhena mipuite hnena kangmei ven chungchang puanzar dan tur hrang hrang sawi ho a ni a. Cable TV leh newspaper kal tlanga a zau thei ang bera puanzar ni se tih niin, AIR leh DDK-ah hun hman ni se, tih a ni bawk. Kangmei laka fimkhur inzirtirna hi sikul hrang hrangah chhiar chhuah tura sem darh a, vantlang zinga puan chhuah atan pek ni bawk se, tih a ni a. Week hman chhung hian vantlang hmun pawimawh laiah kangmei laka inven dan entirna buatsaih leh hmun pawimawhte kangmei laka a him leh him loh en fiah tum a ni bawk.
April ni 14 hi kang thelh vanga boral tate hriat reng nan “Martarte Ni”-ah hman tur a ni a. April ni 20 thleng Week hi hman zui tur niin, thupuiah “Kangmei veng la – Ram hmasawnna thlentu ni rawh” (Prevent Fire Accident – Promote Nation’s Development) tih chu hman a ni ang.
He Meeting-ah hian Home Department leh Fire & Emergency Department bakah, sawrkar Department hrang hrang leh media ai awh mi eng emaw zat an tel a ni.
