Vawiin khan Kolasib DC Pu H. Lalengmawia, IAS chuan ICAR Research Complex for NEH, Mizoram Centre Kolasib ah Litchi leh Avocado chingtu te tan ni hnih awh tur zirtirna ' Two Days Training Programme on Introduction of Litchi and Avocado into IFS System in Mizoram' tih chu a hawng.

Pu H. Lalengmawia chuan ICAR in Mizorama loneitu leh kuthnawktute tan eizawnna kawnga zirtirna leh chhawmdawl hna an thawh chuan rah tha a chhuah a beisei thu sawiin AMFU te nen thawhhona tha tak an nei chu lawmawm a tih thu a sawi a. He huna training tura lokal loneitu te chu fuihin mi hlawhtling leh mi ropui te hi an danglam bik lova, mitin a awm mahni inrintawkna te, thil a eng zawng thlirna te, tuarchhelna te leh mahni inthununna te hi midang zawng aiin an hmang thiamin an hmang rim a, chuvangin heng thil mahnia awmsa kan chhawr tangkai thiam chuan hlawhtlinna kan nei theuh thei a ni, a ti a. Retheihna leh harsatna te chu hmasawnna daltuah ngai lovin hengte hi hma lam pan a min nawr kaltu ah ngai zawk ila tiin a fuih bawk a ni.

Training hawnna inkhawm hi Dr. S. B. Singh, Joint Director, ICAR in a kaihruaia, AMFU aiawh leh Horticulture Department aiawhte pawhin thu an sawi a. Training ah hian Mizoram hmun hrang hrang atangin mi 54 an tel a, ICAR in litchi leh avocado thei tiak leh a phunna senso cheng 2000 theuh an pe dawn a ni.