13^th  Finance Commission Award 2010 -14 sum atanga   sak  Fire Station Building,  Khatla, PHQ Complex   a mi chu  vawiin khan  Home Minister  Pu R Lalzirliana’n a hawng. Pu PC Lalthanliana,  Social Welfare Minister; Lt. Col. (Rtd)  ZS Zuala MLA   leh MLA dang te  bakah  Police hotu lian leh Khatla Local Council  hruaitute hawnna inkhawmah hian an tel tha hle a ni.

Fire Station Building, Khatla a mi hi sak zawhna chu a rei tawh a, remchan zawkna avangin tunah hawn  thar a nih tak dan  chungchang te sawiin khuallian Pu R Lalzirliana chuan  Fire Department  leh Police Department in hma a sawn chhoh zel na ah te, Police mi leh sa te thawhhona ah te an in ngaihpawimawh tawn thiamna leh thawhho nate a that avanga lawmawm a tih thu a sawi a. Police  leh Sorkar hian sual dona  kawngah  tha an thawh  tha hle  a, Sual hi a pung thar ta hluai a ni chuang lova, tunah chuan  inbiakpawhna leh thu thar dawnna te a rang tawh  avang leh sual hi  puanzar zel anih tawh avangin  mitinin an hre thei tawh  zawk a ni a ti bawk.

Mipuiin Police te hi an ring tlat tawh tih a hriatna chu  tunah hian khawtin deuh thawin Police Station an  khuaa dah turin an ngen   a ni tiin Home Minister chuan Police Department tan  Office tur leh quarter turte tha tak tak sak  chhoh mek a niin  a hlui tawh deuh ho te pawh thuam thar chhoh mek an nih dan a sawi a. Police Station inrelbawl chhoh dan pawh duan that zel niin tun ah hian Lunglei Police Station-a awm thin  Kanghmun South leh Zote  PS te chu  Thenzawl Police Station-ah  beh tir an ni  ang a ti a. Chutiang zel chuan  Zoram mipui te himna turin Police Department in hma ala mek  a, mi 425  Police atana lak thar na tur  pawh peih tep a ni tiin  tunah hian  Fire Station  building ITI ah sak zawh tawh hawn mai theih tawh a niin  Kolosib leh Mamit, Serchhip  ah te pawh  Fire Station  building sak mek zawh tep an nih thu a sawi.

Mawhphurhna a san avang leh  mamawhtu an tam avang hian Police te hian sawichhiat leh  sawisel an hlawh hle  a, mahse  chhui chian zel in puh an  nih ang em em chuan  Police te hian Dan an bawhchhe  bik lo  tiin  Pu R Lalzirliana chuan  Police Department in  hma a sawn na leh Fire Station Building sak chhoh mek ah te a hma lama  sulsute  Police hotu leh hnathawktu te hnenah  lawmthu a hrilh  nghal a ni.

Khualzahawm Lt.Col.(Rtd) ZS Zuala  MLA pawhin thu sawiin  Parliamentary Secy anga Police Department  hna a lo thawhpui  thin na ah  an thlawp that na  avangin  lawmthu a sawi a. Police  te hi ralkhat atanga thlir chuan  tawp deuh anga lang,belhchian dawl tak si an ni  a ti a. Ram leh Hnam tan an thiam an finna te hmang chho zel turin  a chah.

Pu Lalhuliana Director,Fire & Emergency Services,Mizoram kaihhruai vawiin programme ah hian Pu Saidingliana  SP  F & ES   chuan   Building sak chhoh dan Brief Report   pe   in  lawmthu a sawi nghal.

Khatla Fire Station Building  sak hna hi PWD Project Division -1 enkawlna hnuaiah Pu Lalroenga’n a thawk a,building Estimate hi  Rs 216,20,978/- a ni a, a hmun hi Police Headquarters lam hotu ten phal taka an pek a ni.

Hawnna inkhawmah hian  Pu  Hmingdailova Khiangte MLA, Pu T T Zothansanga MLA, Pu Lalruatkima MLA  Pu Chhandama Ex MLA   te bakah  Police hotu lian tak tak  te  kalin   thusawi tha tak tak ngaihthlak a ni.