Health and Family Welfare Department leh UNICEF tangkawp buatsaih ni hnih awh tur ‘State Level Consultative Workshop on Integrated Action Plan for Prevention and Control of Pneumonia and Diarrhoea (IAPPD) and India Newborn Action Plan (INAP)’ chu vawiin chawhnu khan Health Minister Pu Lal Thanzara’n State Guest House, Chaltlang-ah a hawng.

Pu Lal Thanzara chuan naupangte hrisel zawk nana H&FW Department leh UNICEF tangkawp ten Workshop an buatsaih chu lawmawm a tih thu sawiin hei hian nasa takin naupiang thihna ti tlemin naupangte hriselna kawngah rah duhawm a thlen ngei a beisei thu a sawi a. Khawvel puma naupang kum 5 hnuailamte thihna za zela 29 chu Kawthalo leh Pneumonia vang a nih thu tarlangin Mizoram-ah ngei pawh naupang kum 5 hnuailam thihna za zela 20  lai chu heng natna pahnih vang hi ni, a ti a. Naupangte heng natna laka veng tur chuan  line department hrang hrangte thawh ho angai a ni, a ti a. Sawrkar laipui pawhin WHO leh UNICEF tena an buatsaih IAPPD programme chu kalpui turin a pawma, Mizoram ah pawh kalpui tura hmalak mek a ni, a ti a.  Minister chuan Pneumonia leh kawthalo laka naupangte fihlim tur chuan naute tha taka hnute tui  leh chawtha pek te, a hun taka vaccination (indanna) lak te, tui thianghlim in te, chenna vawnfaite, kawtha lovah chuan Zinc leh ORS ei te bakah a huntaka Doctor rawn thin te angai a ni , a ti a. UNICEF chungah lawmthu sawiin Mizoram tana an hnathawhte, Health Department hmalakna hrang hrangte an thlawp thin avang in lawmthu a sawi nghal bawk a ni. IAPPD leh INAP tih hlawhtling kawngah Health Detpartment chu amah chauhin a kal theih loh thu sawiin Line Department te thlawpna leh puihna a mamawh zel dawn a, hemi tura hmalakna Action Plan  ngaihtuah hova duang chhuak tura D Workshop neih ani chu  a lawmawm hle a ni a ti.

He hunah hian Dr. Tushar Rane, Chief Field Officer, UNICEF, Assam pawhin thu sawiin Workshop chu naupangte hriselna atan liau liaua buatsaih anih thu leh hemi kawngah hian kan za vaia thawhho angai dawn a ni , a ti a. Natna tlanglawn tam zawkte hi invenna tha hmanga dan theih a nih thu a sawi a. Aizawl Civil Hospital-in tun hnai lawka National Quality Assurance Certificate a dawng chu a lawmpui thu a sawi bawk a ni.

Integrated Action Plan For Prevention and Control of Pneumonia and Diarrhoea (IAPPD) hi National Health Mission hnuaia mi a ni a, hemi hmalakna hian naupang kum 5 hnuai lamte Pneumonia leh Kawthalo laka thihna titlem tura hmalak a ni. Indian Newborn Action Plan  hmang hian Infant Mortality tih tlem tuma hmalak a ni bawk. Heng Programme  pahnihte hi Sustainable Development Goals 2025 hnuai hmalakna tur chhawpchhuah zinga mi an ni.

Ni hnih chhung awh tur Workshop ah hian Line Department hrang hrangte nen IAPPD leh INAP te hlawhtling taka kalpui anih theihna tura hmalakna tur te, enzui zela a hlawhtlin leh tlin loh chhui zui zel dan turte sawiho ani dawn a ni. State level mai bakah District level thlenga task force din te, a tul ang zela enzui leh  endikna neih dan tur te duang chhuak tura hmalak a ni ang.

Vawiin Workshop hawnna ah hian Dr Lalrozama, IAS, Mission Director, National Health Mission-in inlawmna thu a sawi a. Dr Vanlalsawma, Joint Director (Family Welfare) in lawmthu sawina hun hmangin hun a khar a ni. He hunah hian H&FW lam thawktu te, Line Department hrang hrang hotute, UNICEF lama thawktu te bakah NGO lam aiawhte an tel a ni.