Vawiin chawhma dar 10  khan D.C. Conference Hall, Saiha-ah District Fisheries Development Officer (DFDO) buatsaih in Saiha leh Lawngtlai District chhunga Sangha khawitute tan "Fish Farmers Training" neih a ni.

He Training hi Dr Chawngkhuma Chawngthu, President, AMFU, Saiha District chuan a kaihruaia, Pu H.Liansailova, Fisheries  Minister  chu Khuallian niin a hmanpui a, Pu Kunal IAS, Deputy Commissioner, Saiha District chu Khual Zahawm ani.  He Training programme ah hian Pu S.P. Singh, DFDO Saiha & Lawngtlai District chuan kalkhawmte lawmna thu a sawi a, Rev. K.Lalbiakenga, BCM Saiha chuan hunserh a hmang a ni.

Training Programme a Khuallian Pu H.Liansailova, Minister chuan Sangha khawitute hnenah thu sawiin Saiha District chhung tunhnaia a tlawhkualna-ah mipuite duhsakna hrang hrang a dawn avangin lawmthu a sawi a, Chief Minister pawhin Saiha District a ngaih pawimawh thu sawiin kuthnathawktute hi kan VIP te an ni, tih hi intihlawmna mai ni lovin, miretheite khaichhuah leh eizawnna ngelnghet siamsak hi sawrkar chuan a tumber anih thu a sawi a, miretheite hnenah kan tihtheih sangber hi kan ti dawn a ni, a ti bawk. Mipuiten sawrkar atang ringawt a tanpuina dawn tum lovin ataka kan thawh a ngai ani, a ti a, kan eizawnna tlansana ngaihtuahna thar nen a kan ram pumpui ngaihtuah chunga eizawnna kan thlan thiam hi a pawimawh ani, a ti bawk. Eizawnna tak tak thlan aiin tanpuina lokal tur hmachhuana hnathawk thin kan tam thu a sawi a, Sangha Dil siamtute chungchang sawiin Mizoram hian kum khatah Sangha kan thar chhuak tlem em em a, kan tharchhuah aia tam daih hi Sangha chi athlawna semchhuah man hian a lei theih a ni, tiin taimakna, tumruhna leh tih takzetna nena hma la turin Sangha khawi tute chu a chah a ni. Mizoram-ah hian kum tin Sangha Qts. 30000/- vel thar chhuak ang kan ni a, hei hian mipuite mamawh hmunli a thena hmun khat pawh a phuhruk zolo ani, a ti bawk. Saiha District ah hmalakna tur leh Dil siamna tur hmun tha tamtak a awm thu sawiin tihtakzet a kan thawh chuan Sangha Dil hi kumkhat chhungin a puitlin theih ani, a ti a, theihtawp chhuaha hotute hmalakpuina in hmasawnna thar a hmuh ngei a beisei thu a sawi bawk ani. Minister chuan buh leh bal lama kan intodelh theih nan theihtawp chhuaha hmala turin kalkhawmte chu a chah bawk a ni. Sawrkar Flagship Programme "N.L.U.P." chungchang sawiin tundinhmuna sem mai theih a nih loh chhan chu a hlawhchham kan hlauh vang a ni, a ti a, N.L.U.P. dawngtute chuan a Trade kan thlan dan ah kan fimkhur a ngaia kan tuchhuan te thlenga eizawnna ngelnghet siam thei tura rilru kan siam a pawimawh thu a sawi bawk.

District Bawrhsap Pu Kunal, IAS pawh in thu sawiin Sangha khawituten hmasawnna tur a hma an lakna tur hrang hrang te a sawi lang a, eizawnna atana hman tlak anih thu sawiin Saiha District chhunga AMFU hruaitute hmalakna avanga hlawhtlinna chang tate han hmun hian lawmawm a tih thu a sawi bawk a ni.

He Training programme hi chhawng hnih a hun hman a ni a, chawhnu lamah Pu Lalhmingmuana, Programme Co-ordinator KVK Saiha in hun a kaihruaia, Resource Person pathum Pu Lalramzawnchhuaha, Subject Matter Specialist, KVK, Saiha, Dr Lalzaidami, Subject Matter Specialist, KVK, Saiha leh Pu V.Lalnghaka, Fisheries Demonstator ten subject thlanchhuah bikte hmangin kalkhawmte training an pe a, sawihona hun te pawh neih a ni bawk. Pu C.L.Khulua, FEO Hqrs., Saiha chuan lawmthu sawina neiin he training hi tihtawp a ni.