Fisheries Department Lunglei chuan vawiin khan I&PR Conference Hall, Bazar Veng-ah RKVY Scheme hnuaia sangha dil thar siamna tur leh sangha no khawina (rearing area) siamna tur tanpuina mi 36 hnenah an sem a. Vawiina tanpuina an sem zawng zawng hi a vaiin Rs.8,40,000/- a ni.

DFDO Pu VL Hmachhuana chuan tanpuina dawngtute chu sorkarin a phut angin rinawm taka hma la theuh turin a hrilh a, sangha khawi hmanga eizawnna ngelnghet tak an neih theih ngeina turin theihtawp chhuah turin a fuih bawk. RKVY Scheme hnuaiah hian luidunga sangha humhalh leh enkawl mek - Tupui 'D', Zobawk leh Changpui YMA Branch-te hnenah an sangha humhalh that avanga lawmthu sawina leh an lo enkawl zui zel nan lawmman - Tuipui 'D' Rs. 40,000/-, Zobawk & Changpui Rs. 30,000/- ve ve - a pe nghal bawk a ni.