No.6972/2020-2021

Vawiin chawhma khan Dumlui, Kolasiba Chakai Farm, SEDP hnuaia pilot project anga kalpui chu Pu.K.Lalrinliana, Fisheries Department Minister-in a tlawh a, Pu.H.Vanlallawma, Director, Fisheries Department leh Pi.C.Lalparmawii, DFDO, Kolasib ten an tawiawm a ni.

Fisheries Minister chuan chakai chu mizote chawhmeh ngaih hlut leh duh tak a nih angin mumal leh hrisel zawk a farm anga enkawl a tul thu sawiin hemi atan hian Dumlui Kolasibah SEDP hnuaiah enchhina kalpui a nih thu a sawi. Rampum ang pawh a kan la hmelhriat tam loh chakai vulh enchhinna neih mek chu tangkai tak leh hlawhtling tak a kalpui a nih theih nan Department lam a thawktute theihtawp chhuah turin a chah a ni.

Chakai Farm, Dumlui, Kolasib hi March 2020 atanga kalpui tan niin DFDO Office leh ICAR, Kolasib regional center-a mithiamten an vilpui reng a. Rearing pond chakai 30,000 vel khawi theihna tur awmin tunah hian chakai 2,000 bawr vel enkawl chhin a ni. A enkawltute sawi danin chakai enkawl mekte hi an inthlahpun thuai beisei a ni a, uluk zawk a enkawl an nih theih nan Hatchery unit pawh ruahman a nih thu an sawi bawk a ni.