No.6971/2020-2021 

Vawiin chawhma dar 11:30 AM khan Siaha Officers' Club huaihawtin Krismas thilpek hlanna programme I&PR conference Hall-ah an hmang.

Covid-19 hrileng avangin nitin inhlawha eizawng chhungkua ten harsatna an tawh mek a hmuin, SIAHA OFFICERS' CLUB chuan kumtina krismas thilpek a hlan thin: Hospital te, Orphangae Home te, District jail, Rescue Home te chu kumin atan chuan kalkan rih a,chhungkaw harsa zual tak tak hnena Krismas thilpek hi pek turin a lo rel ta a ni.

Vawiin inkhawm hi Dr.K.Rakhu, SMO leh SOC President ni bawk chuan kaihruaiin, Upa H.Lalfakzuala, Principal, DIET leh Asst. Secretary, SOC in hunserh a hmang.

Pu N.Vabeiratlua,DIPRO leh Secretary,SOC chuan report pein, SOC hian kum khat member pakhat in Rs.500/- a thawh hi kan sum neih ve chu a ni mai a. Heti chung hian member te hnenah vehbur khawnin kumtin phang lovin Krismas thilpek atan sumfai Rs 40,000/50,000 vel hi kan sem ve reng thin a ni. Kuminah hian Covid-19 hrileng avanga nitin inhlawh chawp a eizawng chhungkua ten harsatna an tawk nasa a, heng ho tan hian buhfai bag 1 leh Krismas tuk chawhme kan lo tumsak pawh hi a hlu hle dawn in kan hria a. Tichuan member te hnenah vehbur kan khawn ta a ni. Member pakhat in Rs. 1000-15,000 inkar vel an thawh a, Rs. 2,31,000/- kan thawhkhawm ta a ni.

Heng kan sum thawhkhawm te a bo bang awm lovin Siaha town chhunga VC 21 te hnenah kan hlan ang a, VC ten an huamchhung theuh va chhungkaw harsa zual tak tak 5 thlangchhuakin, Rs.2,200/- theuh vin an semchhuak ve leh dawn a ni, a ti.

Pu B.Lalchhawntlunga,PD,DRDA leh DC charge la mektu chuan VCP 21 te hnenah, an VC huamchhunga chhungkaw rethei zual 5 te hnenah sem turin Krismas thilpek hi a hlan hlawm ta a ni.

Pu B.Lalchhawntluanga chuan 'hetianga SOC ten mi chanhai leh harsa zawk te tana ke an penchhuak thin chu ropui a ti thu sawiin, Kan Lal Isua zirtirna nen pawh a inchawih hle a ni, a ti. Hmalam hunah pawh hetiang thil tha tih hi an chhunzawm zel theih nan SOC chu duhsakna a hlan bawk a ni.

Pu K.Chhihrau pawhin thu sawiin; kan thilpek te aimah hian kan pekna thinlung hi a pawimawh a, kan unau te hnenah kan thilpek hian; an mangan ni-ah chuan an mahni hmangaihtu leh khawngaihtu an awm reng a ni, tih hi hriattir se kan duh ber a ni, a ti bawk.

Pu C.Lalrosanga, President Jt.VC chuan VC zawng zawng leh tanpuina dawngtu chhungkaw te aiawhin SOC member te hnenah lawmthu sawiin,SOC avangin kumin chu chhungkaw harsa zawk thahnem takin Krismas hlim leh lawm takin kan hmang dawn a ni. Kan beisei leh rinphak loh thil SOC ten an lo ti hi ropui kan tiin, kan lawm tak zet a ni. Hmalam a kal zelna turah pawh SOC hi duhsakna ka hlanin, midang tana malsawmna nih bang lo turin ka ngen bawk a ni, a ti.

Pu JH.Beihnai, Sports & Youth Services Officer,MADC leh Asst.Secretary, SOC ni bawk chuan lawmthu sawina in vawiin programme hi a khar ta a ni.

Vawiin Krismas thilpek semna Programme-ah hian VC 21 a VCP te,Jt.VC hruaitu te, SOC hruaitu te leh MJA member te an tel a ni.